၁၆. ၁၁. ၂၀၂၃
Written by Nyein Kyaw
နှာခေါင်း၊ မျက်ရစ်နှင့် နှုတ်ခမ်းခွဲစိတ်ကုသမှုအတွက် တရားမဝင်ခွဲစိတ်ကုသခြင်း၊ တရားမဝင်ဆေးဝါးများအသုံးပြုခြင်းများ ဆောင်ရွက်နေသည့် ဆေးကုသခွင့်လိုင်စင်မရှိသည့် ဗီယက်နမ်နိုင်ငံသားတစ်ဦးနှင့် မြန်မာဆရာဝန်တစ်ဦးတို့ ဦးဆောင်ဖွင့်လှစ်ထားသည့် ရန်ကုန်မြို့ရှိ Saigon Beauty Skin & Luxury Clinic အား အမှုဖွင့်လှစ်ကာ အရေးယူဆောင်ရွက်ထားကြောင်း ကျန်းမာရေးဝန်ကြီးဌာနက ယနေ့ ကြေညာသည်။
ရန်ကုန်တိုင်းဒေသကြီး၊ ဗဟန်းမြို့နယ်၊ အမှတ်(၂၄/C)၊ နတ်မောက်ရိပ်သာလမ်း ၊ ဆရာစံရပ်ကွက်တွင် ဖွင့်လှစ်ထားသည်ဟု Facebook စာမျက်နှာတွင် ကြော်ငြာထားသည့် Saigon Beauty Skin & Luxury Clinic လုပ်ငန်းမှ နိုဝင်ဘာ ၁၄ ရက်တွင် Aesthetic လုပ်ငန်းများဖြစ်သော နှာခေါင်းခွဲစိတ်မှုများ၊ မျက်ရစ်နှင့် နှုတ်ခမ်းခွဲစိတ်ကုသမှုများကို ပြုလုပ်ပေးလျက်ရှိကြောင်း လူမှုကွန်ရက်စာမျက်နှာ၌ ကြော်ငြာခဲ့သည်။
ယင်းကဲ့သို့ ကြော်ငြာထားသည်ကို တွေ့ရှိရသဖြင့် ရန်ကုန်တိုင်းဒေသကြီးကုသရေးဦးစီးဌာနမှ တာဝန်ရှိပုဂ္ဂိုလ်များ၊ မြို့နယ်ပုဂ္ဂလိက ကျန်းမာရေးလုပ်ငန်းဆိုင်ရာ ကြီးကြပ်ရေးကော်မတီဝင်များ၊ မြန်မာနိုင်ငံရဲတပ်ဖွဲ့၊ မြို့နယ်အထွေထွေ အုပ်ချုပ်ရေးဦးစီးဌာနနှင့် မြို့နယ်စည်ပင်သာယာရေးအဖွဲ့မှ တာဝန်ရှိသူများ ပူးပေါင်းပါဝင်သော အဖွဲ့ဖြင့် ရှောင်တခင်ဝင်ရောက်စစ်ဆေးရာ မြန်မာနိုင်ငံတွင် ဆေးကုသခွင့်လိုင်စင်မရှိသည့် ဗီယမ်နမ်နိုင်ငံသားတစ်ဦးနှင့် မြန်မာနိုင်ငံသားဆရာဝန်တစ်ဦးတို့ ပါဝင်သောအဖွဲ့မှ တရားမဝင်ခွဲစိတ်ကုသခြင်း၊ တရားမဝင်ဆေးဝါးများအသုံးပြုခြင်းများအား တွေ့ရှိခဲ့ရကြောင်း ထုတ်ပြန်ထားသည်။
အဆိုပါ Saigon Beauty Skin & Luxury Clinic လုပ်ငန်းအား မြန်မာနိုင်ငံဆေးဝါးဥပဒေ၊ မြန်မာနိုင်ငံဆေးကောင်စီဥပဒေနှင့် ပုဂ္ဂလိကကျန်းမာရေးလုပ်ငန်းဆိုင်ရာ ဥပဒေများဖြင့် မြို့နယ်ပြည်သူ့ကျန်းမာရေးဦးစီးဌာနမှူးမှ တရားလိုပြုလုပ်၍ ဗဟန်းမြို့နယ်ရဲစခန်းတွင် အမှုဖွင့်လှစ်ဆောင်ရွက်ထားလျက်ရှိကြောင်း ထုတ်ပြန်ထားသည်။
