၁၄. ၁၁. ၂၀၂၃
Written by KL
စစ်ကိုင်းတိုင်းဒေသကြီး၊ မုံရွာခရိုင်၊ ချမ်းမြဝတီရပ်ကွက် နယ်မြေ(၂) ၊ အမှတ်(၄)လမ်းရှိ ရွှေမြန်မာဂိုထောင်တွင် နိုဝင်ဘာ ၁၃ ရက် နံနက် ၄ နာရီ ၃၈ မိနစ်ခန့်က အရက်ပုလင်းဂျက်ဖာများ မီးလောင်မှုဖြစ်ပွားခဲ့သည်။
အဆိုပါ မီးလောင်မှုမှာ လေဝင်လေထွက်မကောင်းသော ဂိုထောင်ထဲတွင် အရက်ဂျပ်ဖာများအား ကာလရှည်ကြာစွာ ထပ်၍ သိုလှောင်ထားရှိရာမှ အောင်းပူဖြစ်ပေါ်ပြီး မီးစတင်လောင်ကျွမ်းရခြင်းဖြစ်ကြောင်း မုံရွာမြို့နယ်မီးသတ်ဦးစီးဌာနမှ တာဝန်ရှိသူတစ်ဦးက ပြောသည်။
မီးလောင်မှုမှာ မိနစ် ၄၀ ကျော်ကြာမြင့်ခဲ့ပြီး ရှောက်အရက်ဂျပ်ဖာ ၂၀ တွင်ပါဝင်သော အရက်ပုလင်း ၄၈၀ နှင့်ဆိုင်ကယ်တစ်စီး မီးလောင်ဆုံးရှုံးခဲ့ကြောင်း သိရှိရသည်။
အဆိုပါမီးလောင်မှုကို မီးငြှိမ်းသတ်ယာဥ် ၃ စီးနှင့်အတူ မီးသတ်တပ်ဖွဲ့ဝင် ၂၁ ဦးက ငြှိမ်းသတ်ခဲ့သည်။
ဂိုထောင်မီးလောင်မှုနှင့် ပတ်သက်၍ ဦးဇော်မင်းလှိုင်ကို မုံရွာမြို့မရဲစခန်း(ပ) ရာဇသတ်ကြီးဥပဒေပုဒ်မ ၂၈၅ ဖြင့် အမှုဖွင့်အရေးယူထားကြောင်း သိရှိရသည်။
