၁၃. ၁၁. ၂၀၂၃
Written by KL
လှိုင်သာယာမြို့နယ်(အရှေ့ပိုင်း)၊ ရေဥက္ကံကျေးရွာအုပ်စု၊ သောင်းကြားကျေးရွာရှိ တဲတစ်လုံးတွင် နိုဝင်ဘာ ၁၂ ရက် နံနက်ပိုင်းက ဂတ်စ်မီးဖိုမှ ဂတ်စ်အိုးပေါက်ထွက်ရာမှ မီးလောင်မှုဖြစ်ပွားခဲ့ပြီး အမျိုးသားတစ်ဦး လက်နှစ်ဖက်လုံး မီးလောင်ဒဏ်ရာများ ရရှိခဲ့သည်။
ဖြစ်စဥ်မှာ အလျား ၁၀ပေ ၊ အနံပေ၂၀ ရှိ သွပ်မိုး၊ ထရံကာ၊ ဝါးခင်းနေအိမ်တွင် ဂတ်စ်မီးဖိုဖြင့် ထမင်းအိုးတည်ရာမှ ဂတ်စ်အိုးပေါက်ထွက်ပြီး အနီးရှိ ထရံကို မီးကူးစက်လောင်ကျွမ်းခဲ့ခြင်းဖြစ်ကြောင်း၊ မီးလောင်မှုကြောင့် တဲအိမ်တစ်လုံး မီးလောင်ဆုံးရှုံးပြီး အသက် ၄၃ နှစ်အရွယ် အိမ်ရှင် ဦးဇော်လတ်၏ လက်နှစ်ဖက် မီးလောင်ဒဏ်ရာများ ရရှိခဲ့ကြောင်း စစ်ဆေးသူများ၏ အတည်ပြုချက်အရ သိရသည်။
အဆိုပါ မီးလောင်မှုကြောင့် လှိုင်သာယာ(အရှေ့ပိုင်း) မြို့မရဲစခန်းမှ ရာဇသတ်ကြီးပုဒ်မ ၂၈၅ ဖြင့် အိမ်ရှင် ဦးဇော်လတ်ကို အမှုဖွင့် အရေးယူထားကြောင်း သိရှိရသည်။
