၁၁. ၁၁. ၂၀၂၃
Written by Nay Moe
ကယားပြည်နယ်၊ လွိုင်ကော်ကို KNDF နဲ့ PDF တွေ ဒီနေ့မနက်ကစပြီး မြို့သိမ်းတိုက်ပွဲဆင်နွှဲနေတာကြောင့် ထိတွေ့တိုက်ပွဲပြင်းထန်နေသလို လွိုင်ကော် – ဒီးမော့ဆို ၊ လွိုင်ကော်- မိုးဗြဲ ၊ လွိုင်ကော်- ဆီဆိုင် လမ်းမကြီးတွေ အသုံးပြုပြီး အသွားအလာမပြုလုပ်ကြဖို့ KNDF က ဒီမနက်မှာ ထုတ်ပြန်လာပါတယ်။
ကယားပြည်နယ်မှာ လတ်တလောဖြစ်ပေါ်နေတဲ့ စစ်ရေးအခြေအနေအရ” လွိုင်ကော် – ဒီးမော့ဆို ၊ လွိုင်ကော်- မိုးဗြဲ နှင့် လွိုင်ကော်- ဆီဆိုင် ” လမ်းမကြီးတွေရဲ့အနီးတဝိုက်မှာ ဒီနေ့ကစ လခရတပ်ဖွဲ့တွေနဲ့ ကရင်နီတော်လှန်ရေးတပ်ပေါင်းစုအကြား ထိတွေ့တိုက်ပွဲ ဖြစ်ပွားနေတာကြောင့် အများပြည်သူ ခရီးသွားလာတာမလုပ်ဖို့၊ နေအိမ်ပြင်ပထွက် သွားလာတာ မလိုအပ်ရင် မလုပ်ဖို့၊ လုံခြုံတဲ့နေရာနေဖို့၊ စစ်ရေးသတင်းတွေ မလိုအပ်ဘဲဆိုရှယ်မီဒီယာပေါ်မနေဖို့လည်း သတိပေးထားပါတယ်။
“လွိုင်ကော်ရှိပြည်သူများ ညဖက်တင်မကဘဲ နေ့ခင်းဘက်များမှာလည်း ဘယ်အပြင်ကိုမှ သွားလာခြင်း မပြုကြရန် အထူးသတိထားကြပါ။ လိုင်းပေါ် လျောက်လျောက်မတင်ပါနဲ့။ တိတ်ဆိတ်စွာနေပေးပါ။ ကျွန်တော်တို့ကို ကူညီရာ ရောက်ပါတယ်” လို့ KNDF တပ်မှူး ခူရီးဒူက သတိပေးထားပါတယ်။
လက်ရှိမှာ ကရင်နီလက်နက်ကိုင်တွေဘက်က နန်းမယ်ခုံမြို့ကို သိမ်းပိုက်ထားပြီလို့ သတင်းထုတ်ပြန်နေသလို လေကြောင်းတိုက်ခိုက်မှုတွေလည်း ရှိနေပြီး ထိတွေ့တိုက်ပွဲပြင်းထန်နေတယ်လို့ ကနဦးသိရပါတယ်။
