မြတောင်ကျောင်းအနီးပေါက်ကွဲမှုတွင် သေဆုံးရသူအား တွေ့ရစဥ်
MT News
Written by Min Mahar
ယမန်နေ့ နေလည်ပိုင်းက မဟာအောင်မြေမြို့နယ်တွင် လက်လုပ်မိုင်းတစ်လုံးပေါက်ကွဲမှုကြောင့် အသက် ၆၀ အရွယ်အမျိုးသား ၁ ဦး မိုင်းစထိမှန်ကာ သေဆုံးသွားပြီး ပေါက်ကွဲမှုအနီးရှိ ကားတစ်စီးပါ ထိမှန်သွားခဲ့ကြောင်း မြို့ခံများပြောကြားချက်အရ သိရသည်။
ဖြစ်စဉ်မှာ မန္တလေးတိုင်းဒေသကြီး၊ မဟာအောင်မြေမြို့နယ်၊ ရတနာဘုမ္မိအနောက်ရပ်ကွက်၊ ၃၅လမ်း၊ ၈၅×၈၆ လမ်းကြား၊ မြတောင်ကျောင်းတိုက် တောင်ပေါက် အဝင်ပေါက်အနီးရှိ ညောင်ပင်နားတွင် နိုဝင်ဘာလ ၁၈ ရက် နေ့လည် ၁၁ နာရီလောက်က လက်လုပ်မိုင်းတစ်လုံးပေါက်ကွဲမှုဖြစ်ပွားခဲ့ကြောင်း သိရသည်။
“မနက် ၁၁ နာရီလောက် ၃၅ လမ်းပေါ်က မြတောင်ကျောင်းရှေ့နားမှာ ဗုံးတစ်လုံးပေါက်ကွဲခဲ့ပြီး အဲဒီနားလေးမှာရှိတဲ့ ကော်ဖီဆိုင်အတွင်းမှာ ကော်ဖီထိုင်သောက်နေတဲ့ အသက်ကြီးပိုင်းအရွယ်အမျိုးသားတစ်ဦးကို ထိမှန်သွားပြီး ဆေးရုံကိုအသွား လမ်းမှာသေသွားခဲ့တယ်။ ပြီးတော့ အဲ့အနီးမှာရပ်ထားတဲ့ ကားတစ်စီးကိုပါ ထိသွားသေးတယ်” ဟု ပေါက်ကွဲမှုအား မျက်မြင်တွေ့သူတစ်ဦးက ပြောသည်။
အဆိုပါပေါက်ကွဲမှုကြောင့် ၃၅ လမ်း၏ မြောက်ဘက်ခြမ်းတွင်ရှိသည့် ” Coffee king ” ဆိုင်တွင် coffee ထိုင်သောက်နေသည့် အသက် ၆၀ အရွယ်အမျိုးသား ၁ ဦး၏ ဝဲဘက်နားထင်အား မိုင်းစထိမှန်သွားသောကြောင့် ၎င်းအား မဏိဇလလူမှုကူညီရေးယာဥ်ဖြင့် မန္တလေးပြည်သူ့ဆေးရုံကြီးသို့ ပို့ဆောင်နေစဉ် လမ်း၌ပင်သေဆုံးသွားခဲ့ကြောင်း သိရသည်။
၎င်းအပြင် Mazda Demio အမျိုးအစားကားအဖြူရောင်ကိုပါ ထိမှန်သွားကာ ရှေ့အခြမ်းဘန်ကာနှင့် မီးလုံးများပျက်ဆီးသွားရာ ကာလတန်ဖိုး ၇ သိန်းကျပ်ခန့် ပျက်ဆီးဆုံးရှုံးသွားခဲ့ကြောင်းလည်း သိရသည်။
၎င်းပေါက်ကွဲသွားသောလက်လုပ်မိုင်းမှာ ကြိုတင်ချိန်ကိုက် ထောင်ထားသည့်မိုင်းဟု သက်ဆိုင်ရာမှယူဆခဲ့ပြီး မိုင်းထောင်သွားသူသည် မည်သူမည်ဝါဆိုသည်ကို မသိရှိရသေးကြောင်းနှင့် မိုင်းထောင်သည့်သူကို ဖော်ထုတ်ဖမ်းဆီးရမိရေးအတွက် လိုက်လံစုံစမ်းရှာဖွေစစ်ဆေးဖော်ထုတ်လျက်ရှိကြောင်း သိရသော်လည်း အဆိုပါလက်လုပ်မိုင်းအား မည်သည့်အဖွဲ့က ထောင်ထားသည်ကိုမူ မသိရှိရသေးချေ။
