နိုဝင်ဘာ ၆ ရက်က ဓမ္မကာယကျောင်းတိုက်တွင် ကျင်းပခဲ့သော ကထိန်အခမ်းအနားကို တွေ့ရစဥ်
MT News
Written by Tha Doe
ထိုင်းနိုင်ငံနှင့် အာဆီယံနိုင်ငံများ ပါဝင်သော အပြည်ပြည်ဆိုင်ရာ ဒုလ္လဘရဟန်းခံပွဲတွင် ဒုလ္လဘ ၃၀၀၀ အား ရဟန်းခံပေးမည်ဖြစ်ကြောင်း ထိုင်းနိုင်ငံရှိ ဓမ္မကာယကျောင်းတိုက်မှ သိရသည်။
ထိုင်းနိုင်ငံမှ ဝမ်ပါနမ်ဆရာတော်အား အမှူးပြုသော အဆိုပါ ရဟန်း ၃၀၀၀ ဒုလ္လဘရဟန်းခံပွဲအတွက် အလှူရှင်လည်းရှိပြီးဖြစ်ပြီး လက်ရှိအချိန်တွင် ထိုင်းနိုင်ငံရောက်မြန်မာနိုင်ငံသားများနှင့် ကျန်အာဆီယံနိုင်ငံများမှ လူ ၁၆၂၀ ဦး စာရင်းပေးသွင်းထားပြီးဖြစ်ကြောင်း သိရသည်။
“ထိုင်းနိုင်ငံရောက် မြန်မာအမျိုးသားများ ရဟန်းဝတ်လို့ရပါတယ်။ သင်္ကန်းနဲ့ ပရိက္ခရာများအတွက် အလှူရှင်များ ရှိပြီးဖြစ်တဲ့အတွက် ပိုက်ဆံကုန်စရာ မလိုဘဲ ရဟန်းဝတ်နိုင်မှာ ဖြစ်ပါတယ်”ဟု ဓမ္မကာယကျောင်းတိုက်မှ ဆရာတော်တစ်ပါးက မိန့်ကြားသည်
အပြည်ပြည်ဆိုင်ရာ ဒုလ္လဘရဟန်းခံပွဲသို့ နိုဝင်ဘာ ၂၁ ရက်အထိ စာရင်းပေးနိုင်မည်ဖြစ်ပြီး ကျင်းပမည့် အစီအစဥ်များတွင် နိုဝင်ဘာ ၁၉ ရက်၌ ဆံချခြင်း၊၂၀ ရက်နေ့တွင် မိဘ (သို့) အုပ်ထိန်းသူများအား ပြစ်မှားခဲ့သည်များကို ခွင့်လွှတ်ပေးရန် တောင်းပန်ခြင်း၊ ၂၆ ရက်နေ့ နံနက်ပိုင်းတွင် ကိုရင်လောင်းများ ဓမ္မကာယစေတီတော်ကို လှည့်ပတ်ပူဇော်ခြင်း အခမ်းအနားနှင့် ကိုရင်ဝတ် အခမ်းအနားများ ကျင်းပမည်ဖြစ်သည်။
ထို့နောက် ယခုနှစ် ဒီဇင်ဘာ ၁ ၊ ၂ ရက်တွင် ရဟန်းပြု/ရဟန်းခံ အခမ်းအနားကို ၂ ရက် ဆက်တိုက် ကျင်းပမည်ဖြစ်ပြီး သိမ်တက်သည့်အချိန်တွင် ထိုင်းနိုင်ငံတဝှမ်းမှာရှိသည့် ဘုန်းကြီးကျောင်းပေါင်း ၂၀၀ ကျော်သို့ သွားရောက် သိမ်တက်မည်ဖြစ်ကာ ဒီဇင်ဘာ ၄ ရက်နေ့တွင်ရဟန်းသစ်များအား ဆွမ်းလောင်းပွဲ အခမ်းအနား၊၂၀၂၃ ခုနှစ် ဇန်နဝါရီလ တစ်လလုံး ဓုတင်လမ်းလျှောက်အခမ်းအနား၊ ဖေဖော်ဝါရီ ၆ ရက်နေ့မှ စ၍ တရားအားထုတ်ခြင်း၊ တရားထိုင်ခြင်းများပြုလုပ်၍ မတ်လ ၆ ရက်နေ့တွင် မာဃပူဇာဒေး (ဆီမီးပူဇော်ပွဲ)ကျင်းပပြီး မတ်လ ၇ ရက်နေ့တွင် ရဟန်းခံ စီမံကိန်း အောင်မြင်စွာ ပြီးဆုံးမည်ဖြစ်သည်။ ဒုလ္လဝတ်သူများအနေဖြင့် မတ် ၇ ရက်အပြီးတွင် သာသနာ့ဘောင်တွင် ဆက်လက်နေလိုပါကလည်း ဆက်လက်နေထိုင်နိုင်ပြီး လူထွက်လိုပါက လူထွက်နိုင်မည်ဖြစ်ကြောင်း သိရသည်။
ဒုလ္လဘရဟန်းဝတ်အစီအစဥ်ကို နှစ်စဥ်ကျင်းပမည်ဖြစ်ပြီး ဒုလ္လဘရဟန်းဝတ်ချင်သူများအနေဖြင့် နိုဝင်ဘာ ၂၁ ရက်အထိ 0846923891 နှင့် 0947582539 ဖုန်းများကို ဆက်သွယ်နိုင်မည်ဖြစ်သည်။
