ပြည်သူများအကြား ပစ်ခတ်ခဲ့သော ဗုံးတစ်လုံးကို မဖောက်ခွဲမီ တွေ့ရစဥ် (မှတ်ချက်။ ပုံဟောင်းဖြစ်သည်)
၁၉. ၁၁. ၂၀၂၂
Written by Thettant
သင်္ဃန်းကျွန်းမြို့နယ် ဘဝမြင့်မှတ်တိုင်အနီးရှိ ဧရာဝတီဘဏ်အနားတွင် ယနေ့နံနက်က ဗုံးထောင်မှုဖြစ်ပွားခဲ့သဖြင့် လက်ရှိအချိန်တွင် တာဝန်ရှိသူများက လမ်းပိတ်ဆို့ကာ စစ်ဆေးမှုများ ပြုလုပ်နေသည်ဟု ဒေသခံပြည်သူများက ပြောသည်။
ဖြစ်စဥ်မှာ သင်္ဃန်းကျွန်းမြို့နယ် လေးထောင့်ကန်လမ်းမ ဘဝမြင့်မှတ်တိုင်အနီး လေးထောင်ကန် (၅) လမ်းပေါ်ရှိ ဧရာဝတီဘဏ်နှင့် G&G စတိုးဆိုင်အကြားတွင် ဗုံးတွေ့ရှိသဖြင့် တာဝန်ရှိသူများရောက်ရှိလာကာ ဗုံးများထပ်မံထောင်ထားမှု ရှိ မရှိနှင့် ရှင်းလင်းနိုင်ရေး ကြိုးပမ်းကာ တွေ့ရှိသောဗုံးအား ဖောက်ခွဲခဲ့ရကြောင်း သိရသည်။
“မနက်အစောကြီး ဧရာဝတီဘဏ်နဲ့ G&G အနားမှာတွေ့တာ။ ၈ နာရီလောက် တာဝန်ရှိသူတွေရောက်လာပြီး လမ်းတွေပိတ်ဆို့ စစ်ဆေးတာတွေ့ရတယ်။ ၈ နာရီ ၄၅ မိနစ် ေလာက်ကျတော့ ဖောက်ခွဲပစ်လိုက်တာ တွေ့ရတယ်။ ဘယ်သူမှတော့ အထိအခိုက်မရှိဘူး။ အသံကတော့ တော်တော်ကျယ်တယ်။ အိမ်ပါ တုန်သွားတယ်” ဟု လေးထောင့်ကန် (၅) လမ်းအနီး နေထိုင်သူ ဒေသခံတစ်ဦးက ပြောသည်။
