ဘင်္ဂလားဒေ့ရှ်နိုင်ငံတွင် အထည်ချုပ်စက်ရုံအလုပ်သမားများ ဆန္ဒပြပွဲ၌ ရဲတပ်ဖွဲ့နှင့်တိုက်ခိုက်ကြ၍ ကလေးနှစ်ယောက်မိခင် အလုပ်သမ တစ်ဦး သေဆုံး

၉.၁၁.၂၀၂၃.
translated by Htwe Ko Tun

ဘင်္ဂလားဒေ့ရှ်နိုင်ငံ မြို့တော်ဒက်ကာ၏မြောက်ဘက် ၁၆ မိုင်အကွာရှိ ဂါဇီပူရ်စက်မှုမြို့တော်တွင် နိုဝင်ဘာ ၈ ရက်က အသင့်ဝတ်အထည်များထုတ်လုပ်သည့် အလုပ်သမားများက ၎င်းတို့၏ အနိမ့်ဆုံးလစာတိုးမြှင့်ရေးဆန္ဒပြပွဲ၌ ရဲတပ်ဖွဲ့နှင့်တိုက်ခိုက်မှုများ ဖြစ်ပွားခဲ့၍ အလုပ်သမတစ်ဦးသေဆုံးခဲ့ကြောင်း သိရသည်။

နံနက် ၉ နာရီခွဲခန့်ကစတင်ခဲ့သော ဆန္ဒပြပွဲကို ဂါဇီပူရ် မြို့၏ နေရာအနှံ့အပြားပြုလုပ်ခဲ့ကြရာတွင် အလုပ် သမားများက ကားများကိုဖျက်ဆီးခြင်း၊ တာယာများကိုမီးရှို့ခြင်းတို့ ပြုလုပ်ခဲ့ကြသည်။ ထို့နောက် ရဲတပ်ဖွဲ့က ဆန္ဒပြသမားတို့ကို မျက်ရည်ယိုဗုံးများပစ်ခြင်း၊ သေနတ်များနှင့်ပစ်ခတ်ခြင်းတို့ဖြင့် လူစုခွဲထိန်းသိမ်းခဲ့ကြသည်။

ဆန္ဒပြ အလုပ်သမားများဘက်က ဂါဇီပူရ်မြို့အတွင်း အကြမ်းဖက်ဆန္ဒပြမှုများကို ရဲအဖွဲ့က ပစ်ခတ်နှိမ်နင်းမှုများတွင် နှစ်ဖက်ပဋိပက္ခများဖြစ်ပွားခဲ့ရပြီး အသက် ၂၈ နှစ်ရှိ အန်ဂျူရာ ဘီဂမ် အမည်ရှိ သားသမီးနှစ်ဦးမိခင် အထည်ချုပ်စက်ရုံ အလုပ်သမတစ်ဦးမှာ နံနက်ပိုင်းတိုက်ခိုက်မှုများအတွင်း ကျည်ထိမှန်သေဆုံးခဲ့ရသည်။

အထည်ချုပ်စက်ရုံများမှ အလုပ်သမားများက ၎င်းတို့၏လစာကို အနည်းဆုံး တာကာငွေ ၂၃,၀၀၀ အထိ တိုးပေးရန် ဆန္ဒပြတောင်းဆိုနေကြခြင်းဖြစ်သည်။ နိုဝင်ဘာ ၇ ရက်ကမူ အလုပ်ရှင်များက တာကာငွေ ၁၂,၅၀၀ အထိသာတိုးပေးရန် လိုက်လျောခဲ့ကြသဖြင့် ဆန္ဒပြမှုများက ပို၍အရှိန်မြင့်လာခဲ့ခြင်းလည်း ဖြစ်သည်။

Ref—–Daily Star