ပထမအိမ်ထောင်နဲ့ ဇာတ်လမ်းမပြီးပြတ်ဘဲ နောက်အိမ်ထောင်ထူထားတဲ့ အမျိုးသမီးကြောင့် ယောက်ျားတစ်ယောက်သေဆုံးကာ တစ်ယောက်က ထောင်ထဲ ပြန်ဝင်ရ

၄ .၁၁. ၂၀၂၃

Written by Hey Mar

ထောင်က လွတ်လာတဲ့ ယောကျာ်း အိမ်ပြန်ရောက်လာချိန် မိန်းမဖြစ်သူက နောက်အိမ်ထောင်ကို အိမ်ပေါ်ခေါ်တင်ထားတာကြောင့် စကားများရန်ဖြစ်ပြီး လင်ကြီးက လင်ငယ်ကို ကတ်ကြေးနဲ့ထိုးသတ်တဲ့ ဖြစ်စဥ် ဒီနေ့ နိုဝင်ဘာ ၄ ရက် မနက်အစောပိုင်းက ရန်ကုန်တိုင်းဒေသကြီး ပုဇွန်တောင်မြို့နယ်မှာ ဖြစ်ပွားခဲ့တယ်လို့ ဒေသခံ လူမှုကူညီရေးအသင်းကနေ သိရပါတယ်။

သေဆုံးသူက အသက် ၂၄ နှစ်အရွယ် ကျပန်းအလုပ်နဲ့ ဆိုက်ကားနင်းသူ ဖြစ်ပြီး စုစုပေါင်း ဒဏ်ရာ ၁၈ ချက်နဲ့ နေရာတင်သေဆုံးခဲ့တာလို့ သိရပါတယ်။

“ရပ်ကွက်ထဲက အခြေအနေဆိုတော့လည်း သိတန်သလောက် သိပါတယ်။ ကောင်မလေးက နှစ်ယောက်ပေါင်းသလို ဖြစ်နေတာ။ ပထမယောက်ျားက ထောင်ကျနေတုန်း သူက နောက်ယောက်ျားနဲ့ နေတာပေါ့။ ထောင်ထဲက တစ်ယောက်က စောပြီးပြန်ထွက်လာတော့ ပြဿနာတွေတက်ကြတာ။ သေတဲ့ကောင်လေးက ရဲလုပ်ငန်းစဥ်တွေမှာ ကျွန်တော်တို့လည်း ကူညီကြားသိရသလောက် ဒဏ်ရာ ၁၈ ချက်လောက် ရထားတယ်။ ထိုးသွင်းဒဏ်ရာတွေ လည်ပင်းတင် ၂ ချက်ပေါ့။ သတ်တဲ့သူကိုလည်း ရဲတပ်ဖွဲ့က ညတွင်းချင်း ဖမ်းဆီး ထိန်းသိမ်းနိုင်ပါတယ်” လို့ စေတနာ လူမှုကူညီရေးအသင်း တာဝန်ရှိသူတစ်ဦးက ရုပ်အလောင်း သွားရောက်သယ်ဆောင်စဥ်မှာ ကြုံတွေ့ရတဲ့ အခြေအနေကို ပြောပြပါတယ်။

သေဆုံးသူ လူငယ်ကို ရင်ခွဲစစ်ဆေးနိုင်ဖို့ သက်ဆိုင်ရာတာဝန်ရှိသူတွေရဲ့ စီစဥ်ညွှန်ကြားချက်အရ ရန်ကုန်ဆေးရုံကြီး မှုခင်းရဲတပ်ဖွဲ့ထံ ပို့ဆောင်ကူညီပေးခဲ့တယ်လို့ သိရပါတယ်။

(ဓာတ်ပုံ- စေတနာလူမှုကူညီရေးအသင်း)