၂၈. ၁၀. ၂၀၂၃
Written By Thandar
ပရိသတ် ချစ်ခင်မှုကို ပိုမိုရရှိလာတဲ့ သရုပ်ဆောင် အဆိုတော် စိုးပြည့်သဇင်က လွန်ခဲ့တဲ့ ၄ နှစ်က အဆိုတော်မိုးမိုးနဲ့ တွဲဖက်သီဆိုထားတဲ့ ဒီနေ့ Music Video အချစ်သီချင်းလေးထွက်ရှိလာမှာပါလို့ ဆိုပါတယ်။
“ကိုသားငယ်(ဟိန်းဝေယံ)က စိုးပြည့် သီချင်းတွေမှာ အမြဲတမ်း ကူညီပေးတယ်။ သီချင်းလေးက လူငယ်ပုံစံမျိုးလေးက ကိုငယ်နဲ့လည်း လိုက်ဖက်တဲ့ ပုံစံလေးပါ။ စိုးပြည့် ဒီသီချင်းကို အကြောင်းအမျိုးမျိုးကြောင့် ထွက်ဖို့ ကြာသွားတယ်။ လွန်ခဲ့တဲ့ ၄ နှစ် နီးပါးလောက်က သီချင်းဆိုထားပြီး ရိုက်ကူးထားတာပါ။ မထွက်ဖြစ်လိုက်တာပါ။ စိုးပြည့် သီချင်းတွေ လုံးဝမထွက်ဖြစ်တာကြောင့် လုပ်ပြီးသားအဆင်သင့်မို့ ထွက်လိုက်တာပါ။ ကိုမိုးမိုးနဲ့ စိုးပြည့်တို့ စုံတွဲဆိုထားတာပါ။ သီချင်းလေးတွေ မထုတ်ဖြစ်တာလည်း ကြာပြီမို့ တစ်ခါတည်း Music Video လေးထွက်ဖြစ်တာပါ”လို့ သရုပ်ဆောင် စိုးပြည့်သဇင်က ပြောပါတယ်။
အဆိုပါ တေးသီချင်းကို တေးရေး တေးဆို မိုးမိုးက “ဒီနေ့ ကိုယ့်ရဲ့ မိဘများနဲ့ သူလာတွေ့မယ်။ အကောင်းဆုံး ဖြစ်ဖို့ အတွက်ပြင်ဆင်ထားတယ်” ဆိုတဲ့ အချစ်သီချင်းပုံစံရေးသားပေးထားပြီး လာမယ့် နိုဝင်ဘာ ၁ ရက်နေ့မှာ Melo Music Application နဲ့ စိုးပြည့်သဇင် You Tube Chanel ကနေ ထွက်ရှိမှာဖြစ်ပါတယ်။ စိုးပြည့်သဇင်ရဲ့ ဒီနေ့သီချင်းကို သရုပ်ဆောင် ဟိန်းဝေယံက ပါဝင်သရုပ်ဆောင်ပေးထားတာလည်းဖြစ်ပါတယ်။
“ကိုသားငယ်နဲ့ ခင်နေတော့ သူ့ကို အားနာနေတယ် ဆိုတာမျိုး မရှိပါဘူး။ Love Sence ဆိုလည်း အလုပ်ဆိုတော့ လုပ်ရတာပါပဲ ။ တခြား မင်းသားတွေအများကြီးနဲ့ စိုးပြည့် ဒီလို ရိုက်ရင်လည်း အချစ်ခန်း ရိုက်ရင်လည်း ဒီလိုပါပဲ။ ဒီသီချင်းလေးကို ပေါ့ပေါ့ပါးပါး တိုင်ပင်ပြီး ရိုက်ထားကြတာပါ” လို့ သူမက ဆက်ပြောပါတယ်။
