၁၅.၁၁.၂၀၂၂
Written by Thettant
ငါန်းဇွန်မြို့နယ်၊ မင်းနေကုန်းကျေးရွာ လမ်းခွဲ၌ မော်တော်ယာဉ်တစ်စီး မိုင်းထောင်ဖောက်ခွဲခံရ၍ အပြစ်မဲ့ပြည်သူ ၁ ဦးသေဆုံးခဲ့ပြီး ၅ ဦးဒဏ်ရာရရှိခဲ့သည်ဟု သိရသည်။
ဖြစ်စဉ်မှာ မန္တလေးတိုင်းဒေသကြီး၊ အမရပူရမြို့နယ်၊ မှန်တမ်းရပ်ကွက်နေ ဒေါ်လှလှဝင်းသည် မြင်းခြံမြို့နယ်၊ ကျောက်တိုင်ကျေးရွာသို့ မွေးနေ့ပွဲသွားရောက်ရန် မိတ်ဆွေများခေါ်ဆောင်၍ Light Truck အမျိုးအစား မော်တော်ယာဉ်ဖြင့် ထွက်ခွာခဲ့ရာ ငါန်းဇွန်မြို့နယ်၊ တံတားဦး- မြင်းခြံသွား ကားလမ်း၊ မင်းနေကုန်းကျေးရွာလမ်းခွဲသို့ နိုဝင်ဘာ ၁၃ ရက် ညနေ ၃ နာရီခွဲခန့်အချိန်၌ရောက်ရှိစဉ် PDF များက လမ်း၏ ဝဲဘက်ခြမ်းမှ မိုင်းဆွဲ တိုက်ခိုက်ခဲ့သဖြင့် အပြစ်မဲ့ပြည်သူ ၁ ဦး မိုင်းစထိမှန် သေဆုံးခဲ့ပြီး၊ ၅ ဦးတို့တွင် မိုင်းစထိမှန် ဒဏ်ရာများ ရရှိခဲ့ကြောင်း သိရှိရသည်။
အဆိုပါဖြစ်စဥ်၌ ယာဥ်ပေါ်တွင် ယာဥ်မောင်းသူ ဦးဇေယျာမြင့်အပါအဝင် အမျိုးသားလေးဦးနှင့် အမျိုးသမီးရှစ်ဦး လိုက်ပါစီးနင်းလာခဲ့ပြီး Light Truck ယာဉ်သည် အခင်းဖြစ်ရာအရောက်တွင် လက်လုပ်မိုင်းပေါက်ကွဲမှုကြောင့် ယာဉ်ပေါ်လိုက်ပါလာသည့် ခရီးသည်များအနက် မစန္ဒာအောင် (၁၉) နှစ်သည် မိုင်းစထိမှန်ဒဏ်ရာ ၃ ချက်ဖြင့် အခင်းဖြစ်ရာတွင် သေဆုံးခဲ့ပြီး မောင်လမင်းခန့် (၁၃) နှစ်၊ ဒေါ်နီ (၈၂) နှစ်၊ ဒေါ်ဝင်း (၆၄) နှစ်၊ ဒေါ်လှလှဝင်း (၄၇) နှစ် နှင့် ဒေါ်သန်းလှ (၅၀) နှစ်တို့ ၅ ဦးတွင် မိုင်းစထိမှန်ဒဏ်ရာများရရှိခဲ့သဖြင့် ဆေးကုသမှုခံယူနေရကြောင်းသိရသည်။
အဆိုပါ ဖြစ်စဉ်ဖြစ်ပွားရာ နေရာသို့ လုံခြုံရေးတပ်ဖွဲ့ဝင်များက သွားရောက် စစ်ဆေးပြီး သေဆုံးအလောင်းနှင့် ဒဏ်ရာရသူများအား ဆေးကုသမှု ခံယူနိုင်ရေး မန္တလေး ပြည်သူ့ဆေးရုံကြီးသို့ ပို့ဆောင်ဆေးကုသမှု ခံယူစေခဲ့ကြောင်းနှင့် ထိုကဲ့သို့ စစ်ရေး ပစ်မှတ် မဟုတ်သည့် ပြည်သူများအား မိုင်းဆွဲတိုက်ခိုက်ခဲ့သည့် PDF များအား ဖော်ထုတ်ဖမ်းဆီး အရေးယူနိုင်ရေး ဆက်လက်ဆောင်ရွက်လျက်ရှိကြောင်း ထုတ်ပြန်ချက်အရ သိရသည်။
