၂၄. ၁၀. ၂၀၂၃
Written by Pan Ei
ကမ္ဘာတဝှမ်းမှာ အောင်မြင်မှုများစွာနဲ့ ဆုများစွာရရှိခဲ့တဲ့ Squid Game ရုပ်ရှင်ထဲက ပြိုင်ပွဲတွေအတိုင်း အပြင်မှာ တကယ်လက်တွေ့ပြိုင်ဆိုင်ရမယ့် အစစ်အမှန်တီဗီရှိုး Squid Game: The Challenge ကို Netflix ကနေ လာမယ့် နိုဝင်ဘာလအတွင်းမှာ စတင်ပြသတော့မှာဖြစ်တယ်လို့ သိရပါတယ်။
ဇာတ်ညွှန်းမပါဝင်တဲ့ အစစ်အမှန်တီဗီရှိုး Squid Game: The Challenge မှာ ပြိုင်ပွဲဝင် ၄၅၆ ယောက်က ဆုကြေးငွေ အမေရိကန်ဒေါ်လာ ၄ ဒသမ ၅၆ သန်းအတွက် ယှဉ်ပြိုင်ကြမှာဖြစ်ပြီး မနေ့က ရှိုးရဲ့ ထွေလာကို ထုတ်ဖော်ပြသပြီးချိန်မှာတော့ ပရိသတ်တွေရဲ့ စိတ်ဝင်စားမှုကို အတော်လေး ရရှိခဲ့ပါတယ်။
ထွေလာထဲမှာ မူရင်း Squid Game ရုပ်ရှင်ရဲ့ အထင်ရှားဆုံးပြိုင်ပွဲတွေကို ထည့်သွင်းပုံဖော်ထားတာတွေ့ရသလို ပြိုင်ပွဲဝင်အချင်းချင်းကြား သစ္စာဖောက်မှုတွေ၊ ယှဉ်ပြိုင်မှုတွေကိုလည်း ရသမျိုးစုံနဲ့ ကြည့်ရှုနိုင်မှာဖြစ်ပြီး ရှိုးထဲမှာ မူရင်းရုပ်ရှင်နဲ့ မတူညီမယ့် အချက်ကတော့ ပြိုင်ပွဲဝင်တွေကို တကယ် မသေစေခြင်းပဲ ဖြစ်မှာပါ။
အပိုင်း ၁၀ ပိုင်း ပါဝင်မယ့် အစစ်အမှန်ရှိုး Squid Game: The Challenge ကို လာမယ့် နိုဝင်ဘာလ ၂၂ ရက်ကစပြီး Netflix ကနေ စတင် ထုတ်လွှင့်ပြသသွားမှာဖြစ်သလို တစ်ကမ္ဘာလုံးရဲ့ အာရုံစိုက်မှုကိုရရှိခဲ့ပြီး နာမည်ကြီး သရုပ်ဆောင်ပေါင်းများစွာပါဝင်မယ့် မူရင်းရုပ်ရှင် Squid Game ရဲ့ Season 2 ကိုလည်း ပရိသတ်တွေက စောင့်မျှော်နေကြနေကြပါတယ်။
Ref; CNA
