သတ်ဖြတ်ခံရသူများမှာ အထည်ဆိုင်ရှင် သားအဖနှစ်ဦးနှင့် အလုပ်သမတစ်ဦးဖြစ်ဟု သိရ
၂၂. ၁၀.၂၀၂၃
Written by KL
မူဆယ်မြို့ ကျင့်စန်ကျော့သွား လမ်းဘေးအမှိုက်ပုံတွင် အသတ်ခံထားရသော အလောင်း ၃ လောင်းကို တွေ့ရှိခဲ့ပြီး အလောင်းများမှာ ပုပ်ပွနေပြီဖြစ်ကာ ဆာလာအိတ်ဖြင့် လာရောက်စွန့်ပစ်ခဲ့ခြင်းဖြစ်ကာ အမှုနှင့်ပတ်သက်၍ ကျုးလွန်သူကို တာဝန်ရှိသူများက စုံစမ်းနေကြောင်း ဒေသခံများထံမှသိရသည်။
အသတ်ခံထားရသူများမှာ ကျင့်စန်းကျော့တွင် နေထိုင်သော အမျိုးသား ၂ ဦးနှင့် အမျိုးသမီးတစ်ဦးဖြစ်ကြောင်း၊ အမျိုးသား နှစ်ဦးမှာ သားအဖဖြစ်ပြီး အမျိုးသမီးမှာ ယင်းဆိုင်မှစာရေးမဖြစ်ကြောင်း ၎င်းတို့မှာ လွန်ခဲ့သော ၁၀ ရက်ခန့်ကတည်းက ပျောက်ဆုံးနေခြင်းဖြစ်ကြောင်း သိရသည်။
“ဆိုင်ပိတ်ထားတာဆယ်ရက်ကျော်ပြီ။ သူတို့ဘယ်သွားတာလဲ။ ပြန်လည်းမလာသေးဘူးလို့ နေ့တိုင်းမျှော်နေမိ။ ဒီလိုအဖြစ်မျိုးကြုံရပြီးဆုံးသွားတာ”ဟု အသတ်ခံရသူ သားအဖ၏ အထည်ဆိုင်အနီးတွင် ဆိုင်ဖွင့်ထားသူ တစ်ဦးက လူမှုကွန်ရက်တွင် ရေးသားထားသည်။
အသတ်ခံထားရသော အလောင်းများကို အောက်တိုဘာ ၂၁ ရက် နံနက်ပိုင်းက တွေ့ရှိခဲ့ခြင်း ဖြစ်ပြီး အလောင်းများကို မူဆယ်ဆေးရုံသို့ လက်ဖက်ညွန့် လူမှုကူညီရေးအဖွဲ့နှင့် မြင့်မြတ်ပါရမီ လူမှုကူညီရေးအသင်းက သွားရောက်သယ်ဆောင်ပေးခဲ့သည်ဟု သိရသည်။
