၂၂.၁၀.၂၀၂၃
Translated by Htwe Ko Tun
စီအန်အန်သတင်းဌာနရဲ့ နာမည်ကြီးသတင်းထောက်တစ်ယောက်ဖြစ်တဲ့ ဆာရာ ဆစ်ဒ်နာ(Sara Sidner)ဟာ အရှေ့အလယ်ပိုင်းဒေသမှာ ဖြစ်ပွားနေတဲ့ အစ္စရေး-ဟားမားစ် စစ်ပွဲ ကာလအတွင်း မမှန်သတင်းတွေကို အစ္စရေးဘက်က ရေးသားဖော်ပြခဲ့လို့ စိတ်ဆိုးနေကြတဲ့ ပါလက်စတိုင်းတွေနဲ့ အနောက်ဘက်ကမ်းဒေသမှာ အောက်တိုဘာ ၂၀ ရက်က ဆုံတွေ့ခဲ့လို့ ထိပ်တိုက်ဆန္ဒပြမှုကို ရင်ဆိုင်ခဲ့ရတယ်လို့ သိရပါတယ်။
ဆာရာ ဆစ်ဒ်နာက အနောက်ဘက်ကမ်းဒေသ၊ ရာမာလာမြို့မှာ ဆန္ဒပြပွဲတစ်ခုအတွင်းလမ်းလျှောက်လာနေတုံး လူတစ်ယောက်ကပ်လာပြီး “ခင်ဗျားတို့က လူမျိုးတုံး သတ်ဖြတ်မှုကို ထောက်ခံသူတွေပဲ။ ခင်ဗျားတို့လိုလူတွေကို ဒီနေရာကမကြိုဆိုဘူး။ လုပ်ကြံသတင်းဌာန စီအန်အန်” ဆိုပြီး အော်ဟစ်ပြောကြားခဲ့ပါတယ်။
စစ်မြေပြင်မှာဆောင်းကြတဲ့သံခမောက်ဆောင်းပြီး ကျည်ကာအင်္ကျီပါဝတ်ထားတဲ့ ဆာရာ ဆစ်ဒ်နာနဲ့ သူမရဲ့အဖွဲ့ကို လုံခြုံရေးအဖွဲ့တွေက ဘေးကင်းရာကို ခေါ်ဆောင်သွားခဲ့ကြရပါတယ်။
ဒီနောက်မှာတော့ ဆာရာ ဆစ်ဒ်နာ က “ကဲ၊ တွေ့ကြတဲ့အတိုင်းပဲ။ ဒီမှာရှိတဲ့လူတွေက လက်ရှိအရေးမှာ စီအန်အန် ရဲ့တင်ဆက်ပုံကို မကျေမနပ် စိတ်ဆိုးနေကြတယ်” လို့ ပြောခဲ့ပါတယ်။
စီအန်အန် သတင်းဌာန ရဲ့ အစ္စရေး-ဟားမားစ်အရေးမှာ တင်ပြမှုတွေက မမှန်သတင်းတွေဖြစ်နေခဲ့ပြီး နောက်ပိုင်းမှာ သတင်းမမှန်ကန်ပါဘူးလို့ ပြန်လည်ဖွင့်ချခဲ့ရတာတွေ ရှိနေပါတယ်။
ဂါဇာဒေသ၊ ဘက်ပ်တစ် ဆေးရုံမှာပေါက်ကွဲမှုမှာ ဆိုရင် သေကြေဒဏ်ရာရသူအရေအတွက်ကို လွဲမှားဖော်ပြခဲ့လို့ နောက်ပိုင်းမှာ သတင်းမှားယွင်းမှုကိုပြန်လည်ဖြေရှင်းခဲ့ရပါတယ်။ ပေါက်ကွဲမှုက ဘယ်သူ့ လက်ချက်လဲ ဖော်ပြမှုအပေါ်လည်း ပါလက်စတိုင်းတို့ဘက်က သတင်းမှားလို့ဆိုခဲ့ကြပါတယ်။
တစ်ခါ အစ္စရေးဝန်ကြီးချုပ် နေတန်ရာဟုက “ဟားမားစ်အုပ်စုဟာ ကလေးငယ် ၄၀ ကို ခေါင်းဖြတ်သတ်ခဲ့တယ်လို့ပြောခဲ့ကြောင်း” သတင်းကို အောက်တိုဘာ ၁၁ ရက်က ဆာရာ ဆစ်ဒ်နာ ရေးခဲ့ပါသေးတယ်။ နောက်နေ့မှာတော့ ဒီသတင်းမှားယွင်းလို့ ပြန်လည်ရုပ်သိမ်းပါကြောင်းနဲ့ တောင်းပန်ပါကြောင်း သူမက လူမှုကွန်ရက် X မှာ တောင်းပန်ချက်ထုတ်ခဲ့ရပါတယ်။ အစ္စရေးအစိုးရကလည်း ဖြစ်ရပ်ကိုအတည်မပြုသေးလို့ ကြေညာချက်ထုတ်ခဲ့ပါတယ်။
စီအန်အန်ရဲ့ ဒီလို ဘက်လိုက်ပြီး မမှန်သတင်းတွေ ဖော်ပြခဲ့တာတွေက ပါလက်စတိုင်းတွေကို နာကျည်းဒေါသထွက်စေကာ ဆာရာ ဆစ်ဒ်နာအဖို့ ခုလို ထိပ်တိုက်ဆန္ဒပြမှုတွေကြုံခဲ့ရတာလို့ဆိုရမှာဖြစ်ပါတယ်။
Ref: Marca.com, News Arab
