မြန်မာနိုင်ငံရှိ အွန်လိုင်းမှတစ်ဆင့် လိမ်လည်နေသည့်ဂိုဏ်းများလက်ထဲတွင် ဖမ်းဆီးခံထားရသော ထိုင်းနိုင်ငံသား ၁၁၆ ဦးအနက် အချို့ကို ပြန်လည်ကယ်ထုတ်

၂၁. ၁၀. ၂၀၂၃
Written by Nay Aung

မြန်မာနိုင်ငံတွင် အခြေပြုလှုပ်ရှားနေသော အွန်လိုင်းမှတစ်ဆင့် လိမ်လည်နေသည့် ဂိုဏ်းများ၊ ရာဇဝတ်ဂိုဏ်းများ၏ လက်ထဲတွင် ဖမ်းဆီးခံထားရသော ထိုင်းနိုင်ငံသားအနည်းဆုံး ၁၁၆ ဦးရှိနေပြီး အချို့ကို ပြန်လည်ကယ်ထုတ်နိုင်ခဲ့ကြောင်းထိုင်း Tham Thamma ပါတီ၏ လွှတ်တော်ကိုယ်စားလှယ်တစ်ဦးဖြစ်သော Mr. Kanwee Suebsaeng က ထုတ်ဖော်ပြောဆိုလိုက်သည်။

အွန်လိုင်းမှတစ်ဆင့် လိမ်လည်နေသည့် ဂိုဏ်းများလက်ထဲတွင်ပိတ်မိနေသည့် ထိုင်းနိုင်ငံသားများက အကူအညီပေးရန်တောင်းဆိုမှုများကိုလက်ခံရရှိထားကြောင်း၊အဆိုပါ ထိုင်းနိုင်ငံသားများကို ပြန်လည်ကယ်ထုတ်နိုင်ရန်အတွက် ထိုင်းနှင့် မြန်မာအာဏာပိုင်များကြား ပူးပေါင်းဆောင်ရွက်သွားမည်ဖြစ်ကြောင်း ၎င်းကပြောသည်။

လူကုန်ကူးဂိုဏ်းများလက်ထဲတွင် ပိတ်မိနေသည့် ထိုင်းနိုင်ငံသားများကို ပြန်လည်ကယ်တင်နိုင်ရန် ကြိုးပမ်းခဲ့ရာလက်ရှိအချိန်တွင် အချို့ကို ပြန်လည်ကယ်ထုတ်နိုင်ခဲ့သော်လည်း လူဦးရေဘယ်လောက်အထိ ပြန်ကယ်ထုတ်နိုင်သလဲဆိုသောအချက်ကို မသိသေးကြောင်း ထိုင်း Tham Thamma ပါတီ၏ လွှတ်တော်ကိုယ်စားလှယ်ကထပ်မံပြောဆိုထားသည်။

ထို့အတူ မြန်မာနိုင်ငံရှိ အွန်လိုင်းမှတစ်ဆင့်လိမ်လည်နေသည့်ဂိုဏ်းများလက်ထဲတွင် ပိတ်မိနေသည့် ထိုင်းနိုင်ငံသားအားလုံးကို အမြန်ဆုံးပြန်လည်ကယ်ထုတ်နိုင်မည်ဟုမျှော်လင့်ထားကြောင်း ၎င်းကပြောသည်။ တရုတ်အစိုးရသည် ၎င်းတို့နိုင်ငံအတွင်းရှိ အွန်လိုင်းမှတစ်ဆင့်လိမ်လည်နေသည့်ဂိုဏ်းများ၊ ရာဇဝတ်ဂိုဏ်းများကို ဖြိုခွင်းခဲ့ရာ အဆိုပါဂိုဏ်းများသည် ထိုင်းနှင့်မြန်မာနယ်စပ်ဒေသတစ်လျှောက်သို့ ကူးပြောင်းလာခဲ့ပြီးမြန်မာနိုင်ငံဘက်ခြမ်းတွင်အခြေပြုလှုပ်ရှားနေကြောင်းသိရသည်။

မြန်မာနယ်စပ်ဒေသတစ်လျှောက်တွင် လှုပ်ရှားနေသော အွန်လိုင်းအသုံးပြုကာ လိမ်လည်နေသည့် လူကုန်ကူးဂိုဏ်းများသည် သားကောင်များကို ထိုင်းနိုင်ငံဘက်ခြမ်းမှတစ်ဆင့် မြန်မာနိုင်ငံသို့ ခေါ်ဆောင်မှုများလည်းရှိနေကြောင်းသိရသည်။ ထိုင်း၊ မြန်မာ၊လာအိုနှင့်တရုတ်နိုင်ငံ ရဲတပ်ဖွဲ့တို့ ပူးပေါင်းပြီး နယ်စပ်ဒေသတွင် အခြေပြုလှုပ်ရှားနေသော အွန်လိုင်းအသုံးပြုကာလိမ်လည်နေသည့်ဂိုဏ်းများကို ဖြိုခွင်းလျက်ရှိနေကြောင်းသိရသည်။

Ref; matichon