အိန္ဒိယအစိုးရက သံတမန်ကင်းလွတ်ခွင့်များ ဖယ်ရှားမည်ဟု သတိပေးပြီးနောက် ကနေဒါက အိန္ဒိယနိုင်ငံမှ ၎င်း၏သံတမန်များ ပြန်လည်ရုပ်သိမ်း

၂၀. ၁၀. ၂၀၂၃
Translated by Htwe Ko Tun

အိန္ဒိယနိုင်ငံရှိ ကနေဒါသံတမန်များအနေနှင့် ၎င်းတို့၏ သံတမန်ကင်းလွတ်ခွင့်အခွင့်အရေးများ ဆုံးရှုံးရတော့မည်ဟု ယူဆရသောကာလတွင် ထိုသို့ကင်းလွတ်ခွင့်များ ဖယ်ရှားခံရရန် တစ်ရက်သာလိုသောအချိန် အောက်တိုဘာ ၁၉ ရက်၌ ကနေဒါသံတမန် ၄၁ ဦး အိန္ဒိယမှပြန်လည်ထွက်ခွာမည်ဟု ကနေဒါအစိုးရက ကြေညာချက်ထုတ်ခဲ့သည်။

သို့သော် ကနေဒါအစိုးရအနေနှင့် သံတမန်အငြင်းပွားမှု နှစ်နိုင်ငံကြားဖြစ်ပွားနေမှုကို ဆက်လက်အရှိန်မြှင့်ရန်မလိုလားပါကြောင်းနှင့် သံတမန်များကို နှင်ထုတ်မှုဟုပင်ယူဆရမည်ဖြစ် သော်လည်း ထိုကဲ့သို့ ပြန်လည်တုံ့ပြန်ရန် ဆုံးဖြတ်မထားကြောင်း ကနေဒါ နိုင်ငံခြားရေးဝန်ကြီး မီလာနီ ဂျိုလီက ပြောခဲ့သည်။

ကနေဒါနိုင်ငံက အိန္ဒိယနိုင်ငံရှိ သံတမန်အရေအတွက် ၆၂ ဦးအနက် ၄၁ ဦးကို အိန္ဒိယအစိုးရ၏သတိပေးချက်အရ ပြန်လည်ခေါ်ယူခြင်းဖြစ်ပြီး ၂၁ ဦး ဆက်လက်ကျန်ရှိနေမည်ဖြစ်သည်။ ထွက်ခွာလာမည့် ၄၁ ဦးနှင့်အတူ မိသားစုဝင် ၄၂ ဦးပါရှိမည်ဖြစ်ကြောင်းလည်း သိရသည်။

အော့တာဝါမြို့တွင် အောက်တိုဘာ ၁၉ ရက်က ပြုလုပ်သော သတင်းစာရှင်းပွဲတစ်ခု၌ ဂျိုလီက သံတမန်များအနေနှင့် ပြည်ပနိုင်ငံများတွင် သံတမန်များအတွက် ကင်းလွတ်ခွင့်များမရရှိပါဘဲ တာဝန်ထမ်းဆောင်၍ မရကြောင်း၊ ဤသို့ ခံစားခွင့်နှင့် အခွင့်အရေးများကို တစ်ဖက်သတ်ဖယ်ရှားရုပ်သိမ်းခြင်းက အပြည်ပြည်ဆိုင်ရာဥပဒေနှင့် ဆန့်ကျင်နေကြောင်း၊သံတမန်ဆက်သွယ်ရေးဆိုင်ရာဗီယင်နာ သဘောတူညီချက်ကို ချိုးဖောက်ခြင်းလည်းဖြစ်ကြောင်း ပြောခဲ့သည်။

ကနေဒါနိုင်ငံသားဖြစ်သော်လည်း အိန္ဒိယနိုင်ငံ၊ ခါလီစတန်ပြည်နယ်အား ဆစ်ခ်လူမျိုးတို့ ကိုယ်ပိုင်အမိနိုင်ငံအဖြစ် ခွဲထွက်ရန်လှုပ်ရှားမှုကိုထောက်ခံသူ ဆစ်ခ်လူမျိုးတက်ကြွလှုပ်ရှားသူ ဆင်းနစ်ဂျာကို ဇွန်လ ၁၈ ရက်က ကနေဒါနိုင်ငံတွင် အသတ်ခံရမှု၌ နောက်ကွယ်မှ အိန္ဒိယအစိုးရပါဝင်နေသည်ဟု ကနေဒါဝန် ကြီးချုပ်ဂျပ်စတင် ထရူးဒေါကစက်တင်ဘာလတွင် ပြောခဲ့ပြီးနောက်မှစ၍ နှစ်နိုင်ငံဆက်ဆံရေး တင်းမာလာခဲ့ခြင်းဖြစ်သည်။ အိန္ဒိယအစိုးရက တုံ့ပြန်သည့်အနေဖြင့် အိန္ဒိယနိုင်ငံအတွင်းမှ ကနေဒါသံတမန်အဖွဲ ဝင် ၄၁ ဦးကို အောက်တိုဘာ ၂၀ ရက်နောက်ဆုံးထား၍ ရုပ်သိမ်းရန်၊ သို့မဟုတ်ပါက ၎င်းတို့၏ သံတမန်ကင်းလွတ်ခွင့်များ ရုပ်သိမ်းမည်ဟု ရာဇသံပေးခဲ့ခြင်းဖြစ်သည်။

Ref—–Hindustan Times