၁၈. ၁၀. ၂၀၂၃
Written by KL
ရန်ကုန်တိုင်းဒေသကြီး၊ ရန်ကင်းမြို့နယ်၊ အမှတ် (၂) ရပ်ကွက်၊ ဆရာစံလမ်းပေါ်မှ ရန်ကင်းစင်တာ ၃ လွှာရှိ တိုက်ခန်းတစ်ခုတွင် အောက်တိုဘာ ၁၇ ရက် ညနေပိုင်းက လောင်ကျွမ်းခဲ့သော မီးလောင်မှုမှာ ဆေးသုတ်သမားထားခဲ့သော ဆေးလိပ်တိုမီးမှ မီးစတင်လောင်ကျွမ်းခဲ့ခြင်းဖြစ်ကြောင်း မီးသတ်တပ်ဖွဲ့၏ စစ်ဆေးချက်များအရ သိရသည်။
မီးစတင်လောင်ကျွမ်းခဲ့သော တိုက်ခန်းမှာ ပြင်ဆင်နေဆဲအခန်းဖြစ်ပြီး ဆေးသုတ်သမားက အခန်းတွင်းအုတ်ဘောင်ပေါ်တွင် ဆေးလိပ်တိုမီးထားခဲ့ရာမှ အခန်းတွင်းရှိ လွှစာမှုန့်များပေါ်သို့ ဆေးလိပ်တိုကျကာ မီးကူးစက်လောင်ကျွမ်းခဲ့ခြင်းဖြစ်သည်။ အဆိုပါ မီးလောင်မှုမှာ ၉ မိနစ်ခန့်ကြာ လောင်ကျွမ်းခဲ့ပြီး ဘထ္ထရီအိုးနှင့် ပစ္စည်းအချို့ မီးလောင်ဆုံးရှုံးခဲ့ကြောင်း သိရသည်။
“စစလောင်ခြင်းတော့ မီးတောက်က အရမ်းကြီးတယ်။ ခဏလေးပဲ မီးလောင်တာက မကြာလိုက်ဘူး “ဟု ရန်ကင်းစင်တာအနီး နေထိုင်သူတစ်ဦးက ပြောသည်။
မီးလောင်မှုနှင့် ပတ်သက်၍ အသက် ၃၅ နှစ်အရွယ်ရှိ ဆေးသုတ်သမား အမျိုးသားကို ရန်ကင်းမြို့မရဲစခန်းက ပုဒ်မ ၂၈၅ဖြင့် အမှုဖွင့် အရေးယူထားသည်။
အလားတူ အောက်တိုဘာ ၁၇ ရက် နံနက်ပိုင်းက ဒဂုံမြို့သစ် (တောင်ပိုင်း)မြို့နယ်၊ အမှတ်၁၈/Aရပ်ကွက်၊ အောင်မင်္ဂလာလမ်းရှိ ၂ ထပ်တိုက်အပေါ်ထပ်တွင် အားသွင်းပန်ကာ အားသွင်းထားရာမှ Loose ဖြစ်ပြီး မီးပွားထွက်ရာမှ မီးလောင်မှုဖြစ်ပွားခဲ့ရာ အပေါ်ထပ်ရှိ မျက်နှာကျက်နှင့် အတွင်းပစ္စည်းများ ဆုံးရှုံးခဲ့သည်။
ပုံစာ။ ရန်ကင်းစင်တာ မီးလောင်မှုနှင့် တောင်ဒဂုံမီးလောင်မှုမြင်ကွင်း (Photo – Credit)
