၁၁. ၁၀. ၂၀၂၃
Written by Pan Ei
တမူထူးခြားတဲ့ သရုပ်ဆောင်ချက်တွေနဲ့အတူ အထိန်းတော်ကြီးဇာတ်ရုပ်နဲ့ မြန်မာနိုင်ငံက ပရိသတ်တွေကြားထဲမှာသာမက နိုင်ငံတကာက ပရိသတ်တွေကြားမှာပါ နာမည်ကြီးပြီး တချို့သော Meme တွေရဲ့ ဇာတ်လိုက်ဖြစ်ခဲ့တဲ့ တောင်ကိုရီးယားမင်းသမီး Cha Chung Hwa က အခုလအတွင်းမှာ အနုပညာရှင်မဟုတ်တဲ့ ချစ်သူနဲ့ လက်ထပ်တော့မယ်လို့ သိရပါတယ်။
သူမရဲ့အေဂျင်စီဖြစ်တဲ့ IOK Company က “Cha Chung Hwa ဟာ အောက်တိုဘာ ၂၇ ရက်နေ့ ဆိုးလ်မှာ သူမထက် အသက်ငယ်တဲ့ စီးပွားရေးလုပ်ငန်းရှင်တစ်ဦးနဲ့ လက်ထပ်တော့မှာဖြစ်ပြီး မင်္ဂလာပွဲကို သီးသန့်အခမ်းအနားအနေနဲ့ ကျင်းပသွားမယ်”လို့ ဒီနေ့မနက်မှာ ကြေညာခဲ့တာပါ။
ဒါ့အပြင် သတို့သားလောင်းက အနုပညာရှင်မဟုတ်တာကြောင့် သူ့ရဲ့ကိုယ်ရေးကိုယ်တာအချက်အလက်တွေ ဖော်ပြလို့မရနိုင်တာကို နားလည်ပေးဖို့လည်း IOK Company က မေတ္တာရပ်ခံထားပါတယ်။
Cha Chung Hwa နဲ့ သူမရဲ့ခင်ပွန်းလောင်းဖြစ်သူတို့ဟာ အချိန်အတော်ကြာ သိကျွမ်းလာသူတွေဖြစ်ကြပြီး ရင်းနှီးတဲ့အချိန်ကြာလာတာနဲ့အမျှ သူတို့နှစ်ယောက်ရဲ့ ဆက်ဆံရေးမှာ အချစ်ပန်းတွေ ပွင့်လန်းလာခဲ့တာဖြစ်တယ်လို့လည်း သိရပါတယ်။
ပရိသတ်အချစ်တော် မင်းသမီး Cha Chung Hwa ဟာ ၂၀၀၅ ခုနှစ် ပွဲဦးထွက်ကတည်းက သူမရဲ့ သရုပ်ဆောင်အလုပ်ကို တက်ကြွစွာ လုပ်ဆောင်နေသူတစ်ဦးဖြစ်ပြီး သူမ သရုပ်ဆောင်ခဲ့တဲ့ ဒရမ်မာပေါင်းများစွာထဲမှာမှ နာမည်ကြီး ဒရမ်မာ ‘Crash Landing on You’ နဲ့ လူသိအများဆုံးဖြစ်ခဲ့တာပါ။ ဒါ့အပြင် သူမက ‘Hometown Cha Cha Cha’၊ ‘Mr Queen’ နဲ့ ‘See You in My 19th Life’ စတဲ့ နာမည်ကြီး ဒရာမာတွေမှာလည်း ပါဝင်သရုပ်ဆောင်ခဲ့ပါတယ်။
Ref; allkpop
