◾️ နှစ်ဘက်ထိခိုက်သေဆုံးမှုများမြင့်တက်
၉. ၁၀. ၂၀၂၃
Translated by Htwe Ko Tun
အစ္စရေးနိုင်ငံတောင်ပိုင်းကို အောက်တိုဘာလ ၇ ရက် အရုဏ်တက်ချိန်တွင် ဟားမားစ်စစ်သွေးကြွများ ရုတ်တရက်ဝင်ရောက်တိုက်ခိုက်ခဲ့ကာ အစ္စရေးမြို့များသို့ ဒုံးကျည်များ ထောင်နှင့်ချီ၍ ခုနှစ်နာရီခွဲခန့်ကြာအောင် ပစ်ခတ်ခဲ့မှုအပြီး အစ္စရေး လေတပ်ကလည်း ဂါဇာဒေသအား လေကြောင်းမှ ပြင်းထန်စွာ တိုက်ခိုက်၍ တန်ပြန်ထိုးစစ်ပြုလုပ်လျက်ရှိသည်။
အစ္စရေးတို့၏ လေကြောင်းတိုက်ခိုက်မှုများအတွင်း ဂါဇာကမ်းမြောင်ဒေသ၌ သေဆုံးသူအရေအတွက်မှာ အောက်တိုဘာလ ၉ ရက်နံနက်အထိ ကလေး ၇၈ ဦး အပါအဝင် ပါလက်စတိုင်းပြည်သူ ၄၁၃ ဦးသေဆုံးကာ ၂,၃၀၀ ကျော် ဒဏ်ရာရရှိခဲ့ကြောင်း ပါလက်စတိုင်းကျန်းမာရေးဝန်ကြီးဌာနက ပြောခဲ့သည်။
ဂါဇာကမ်းမြောင်နေသူတစ်ဦးကလည်း ၎င်းတို့တွင် လေကြောင်းတိုက်ခိုက်မှုမှ ရှောင်တိမ်းရန် နယ်မြေမရှိကြောင်းနှင့် အစ္စရေးလေတပ်က ၁၅ မိနစ်ခန့်တွင် ဗုံးတစ်လုံးကြဲချတိုက်ခိုက်နေသည်ဟု ပြောခဲ့သည်။
အောက်တိုဘာလ ၇ ရက်က အစ္စရေးအပျော်တမ်းကယ်ဆယ်ရေးတပ်ဖွဲ့ဖြစ်သော Zaka က Nova တေးဂီတဖျော်ဖြေပွဲတစ်ခုတွင် ဟားမားစ်တို့က ဝင်ရောက်တိုက်ခိုက်ခဲ့၍ အရပ်သား ၂၆၀ ဦး သေဆုံးခဲ့ရကြောင်းပြောခဲ့သည်။
ဟားမားစ်တို့၏ တိုက်ခိုက်မှုများကြောင့်လည်း အစ္စရေးပြည်သူ ၇၀၀ ကျော်သေဆုံးခဲ့ရပြီဖြစ်ကြောင်း သတင်းများက ဖော်ပြခဲ့ကြသည်။ ထို့ပြင် အစ္စရေးပြည်သူ ၁၀၀ ကျော်ကိုလည်း ဟားမားစ်တို့က ပြန်ပေးဆွဲခေါ်ဆောင်သွားကြောင်း သိရသည်။
အစ္စရေး နိုင်ငံတောင်ပိုင်းတွင် ပစ်ခတ်မှုများ ဆက်လက်ဖြစ်ပွားနေဆဲဖြစ်ကာ ဟားမားစ်တို့ကလည်း အစ္စရေးနိုင်ငံအတွင်း ဒုံးကျည်များ ဆက်လက်ပစ်လွှတ်နေဆဲဖြစ်သည်။
ဟားမားစ်တို့က ၎င်းတို့၏ အစ္စရေး တောင်ပိုင်းသို့ အောက်တိုဘာ ၇ ရက်တွင် ရုတ်တရက်ဝင်ရောက်တိုက်ခိုက်မှုအား အီရန်တို့က အကူအညီပေးခဲ့ကြောင်း Wall Street Journal သို့ ပြောခဲ့ကြသည်။
Ref–The Times of Israel, Al Jazeera
