၂၉.၉.၂၀၂၃
Written By Thandar
သရဲဟာသ ဇာတ်လမ်းပုံစံ “အိမ်မြှောင်” ရုပ်ရှင်ဇာတ်ကားကြီး စာနယ်ဇင်းမိတ်ဆက်ပွဲကို စက်တင်ဘာ ၂၉ ရက် နံနက်ပိုင်းက ရန်ကုန်မြို့ တောင်ဥက္ကလာမြို့နယ် Yangon Ambience Restaurant မှာ ကျင်းပခဲ့ပါတယ်။
“အိမ်မြှောင်ဇာတ်ကားလေးက ကျွန်တော်နဲ့ Weflex ထုတ်လုပ်ရေးတို့ ပထမဆုံး ပူးပေါင်းရိုက်ကူးတဲ့ ဇာတ်ကားလေးပါ။ ဒီဇာတ်ကားက သရဲဟာသကားပုံစံလေးကိုမှ ထူးခြားမှုလေးတွေ ပါပါတယ်။ ထိပ်လန့်စရာလေးကတော့ လျှို့ဝှက်ထားချင်ပါသေးတယ်။ ကျွန်တော်ဇာတ်ကားနဲ့ ပတ်သက်ပြီး အကောင်းဆုံးကြိုးစားရိုက်ကူးသွားမှာပါ” လို့ ဒါရိုက်တာ သားညီက ပြောပါတယ်။
ဇာတ်ညွှန်းမို့ရဲ့ လက်ရာကောင်းတစ်ခုဖြစ်တဲ့ “အိမ်မြှောင်” ရုပ်ရှင်ဇာတ်ကားကို မြင်တွေ့နေကြပုံစံမျိုးမဟုတ်ဘဲ ဇာတ်လမ်း၊ ဇာတ်အိမ် ထူးခြားမှုတွေနဲ့အတူ ဒါရိုက်တာသားညီက ပုံဖော်သွားမှာဖြစ်ပါတယ်။
“ဒီကားထဲမှာ မေလေးပါ၀င်ရမယ့် ကာရိုက်တာပုံစံလေးက ထူးဆန်းတယ်။ သင်ရမယ့် ဟာလေးတွေလည်း ရှိတယ်။ အဝတ် အစားကအစ ထူးထူးဆန်းဆန်းလေးဆိုတော့ ပြင်ဆင်ရမယ့် အရာတွေကတော့ အများကြီးပါ။ ဇာတ်လမ်းပုံစံလေးကလည်း ပရိသတ်စိတ်၀င်စားတဲ့ ပုံစံလေးဖြစ်မှာပါ” လို့ သရုပ်ဆောင် မေမြင့်မိုရ်က ပြောပါတယ်။
Weflex Production က ပွဲဦးထွက် ရိုက်ကူးတင်ဆက်မယ့် အိမ်မြှောင်ရုပ်ရှင်ဇာတ်ကားမှာ သရုပ်ဆောင် အကယ်ဒမီ ကျော်ကျော်ဗိုလ်၊ မေမြင့်မိုရ်၊ ထွန်းပုလဲရတနာ၊ အေမီဈာန်၊ ဂျိုကာ၊ ကေညီ၊ မိုးညို၊ ကလေးသရုပ်ဆောင် ဧကရီဇော်တို့နဲ့ မနက် ဖြန် စက်တင်ဘာ ၃၀ မှာ စတင်ရိုက်ကူးသွားမယ်လို့ သိရပါတယ်။
