၂၆.၉.၂၀၂၃
Written by Peya
အင်းစိန် BOC မှတ်တိုင်အနီး ဖြစ်ပွားခဲ့သည့် YBS နှင့် ဟိုက်ဂျက်ကားတို့ တိုက်မိသည့် ဖြစ်စဉ်တွင် ကားအတွင်းညပ်နေခဲ့သည့် ဟိုက်ဂျက်ယာဉ်မောင်းမှာ အသက်အန္တရာယ် စိုးရိမ်ရကြောင်း ဖြစ်စဉ်ကို ကူညီပေးခဲ့သည့် တွဲလက်လူမှုကူညီရေးအသင်းမှ တာဝန်ရှိသူတစ်ဦးက MT News သတင်းဌာနသို့ ပြောသည်။
အဆိုပါဖြစ်စဉ်မှာ ရန်ကုန်တိုင်းဒေသကြီး၊ အင်းစိန်မြို့နယ်၊ ရန်ကုန်-အင်းစိန်လမ်းမကြီး၊ ကြို့ကုန်းအရှေ့၊ BOC မှတ်တိုင်အနီးတွင် ယနေ့ စက်တင်ဘာ ၂၆ ရက် နံနက်ပိုင်း ၈ နာရီခွဲ အချိန်ခန့်က ဖြစ်ပွားခဲ့ခြင်းဖြစ်ကြောင်း သိရကာ YBS 41 ယာဉ်က ဟိုက်ဂျက်ယာဉ်ကို အနောက်မှတိုက်မိခဲ့ခြင်းဖြစ်ပြီး ကားအတွင်း ညှပ်နေခဲ့သည့် ယာဉ်မောင်းကို ကယ်ထုတ်ခဲ့ရခြင်း ဖြစ်သည်။
“ဟိုက်ဂျက်က ဝိုက်နေတဲ့ အချိန် YBS က နောက်က ဝင်တိုက်တာပါ။ ဟိုက်ဂျက်က အလယ်က ပလက်ဖောင်းတုံးကို ထပ်တိုက်မိပြီး ယာဉ်မောင်းက ကားထဲမှာ ညပ်သွားတာပါ။ ဒဏ်ရာရတာက သုံးယောက်ပါ။ YBS ပေါ်က ၂ ယောက်ပါ။ ဟိုက်ဂျက် ယာဉ်မောင်း ၁ ယောက်ပါ” ဟု အဆိုပါအသင်းမှ တာဝန်ရှိသူတစ်ဦးက ဆိုသည်။
ဟိုက်ဂျက်ယာဉ်မောင်းမှာ လူငယ်တစ်ဦးဖြစ်ပြီး အဆိုပါယာဉ်မောင်းမှာ စိုးရိမ်ရဒဏ်ရာရသောကြောင့် အသက်အန္တရာယ် ထိခိုက်နိုင်သည့် အခြေအနေဖြစ်ပြီး ဒဏ်ရာဒဏ်ချက်လည်း များပြားကြောင်း ၎င်းက ဆိုသည်။
