၂၁.၉.၂၀၂၃
Written By Thandar
ဗန့်ကာရိုက်တာနဲ့ ပရိသတ်အားပေးမှုရရှိလာတဲ့ သရုပ်ဆောင် သာသာကတော့ “အမှား (or) Mistake” ဇာတ်လမ်းတွဲမှာ မြိုင်ဆိုတဲ့နေရာက စပွန်ဆာဘဲကြီးထားပြီးတော့ မောင်လေးတွေ အမ်းတဲ့ကာရိုက်တာ ရိုက်ထားတယ်လို့ ဆိုပါတယ်။
“သာသာ Mistake ဇာတ်လမ်းတွဲမှာ ဗန့်ကာရိုက်တာနဲ့ သရုပ်ဆောင်ထားတယ်။ သာနဲ့ ဒီကာရိုက်တာ လိုက်တယ်ဆိုလို့ လက်ခံဖြစ်သွားတာပါ။ ဒီကားထဲမှာ မြိုင်ဆိုတဲ့နေရာက စပွန်ဆာဘဲကြီးထားပြီးတော့ မောင်လေးတွေ အမ်းတဲ့ကာရိုက်တာရိုက်ထားတယ်။ မြိုင်နေရာက ဝဋ်လည်တယ် ပြောရမလား။ ချူစားခံရတဲ့ ဇာတ်လေးပါ။ မြိုင်ကာရိုက်တာက တော်တော်လေးကို လုပ်ကွက်လေးရပါတယ်။ သာ့ကို အခုနောက်ပိုင်း ဗန့်ကာရိုက်တာတွေကို ကမ်းလှမ်းလာတာများကြတယ်”လို့ သရုပ်ဆောင် သာသာက ပြောပါတယ်။
အမှားဇာတ်လမ်းတွဲကို ဇာတ်လမ်းဇာတ်ညွှန်း မေသူထွန်း ရေးသားထားပြီး ဒါရိုက်တာ မင်းစနေက သရုပ်ဆောင် နေရှိုင်း၊ နေ့သစ်အေးအောင်၊ မေသူထွန်း၊ မင်းသူ၊ သာသာ၊ ငြိမ်း၊ ဇေယံနွေ၊ ဟက်ပီး၊ ဇေယျာမင်းထက်၊ သူရဟိန်း၊ လင်း၊ သီဟအောင်၊ အိမ့်ရူပါသက်လွင်၊ သိင်္ဂီမြင့်၊ မီမီသိန်းတို့နဲ့ မန္တလေးမြို့မှာ ပုံဖော်ရိုက်ကူးထားကြပါတယ်။
“မြိုင်က သူဌေးကြီးတွေအနားမှာနေပြီး ငွေကိုရေလိုသုံးနိုင်နေပေမဲ့ မပျော်ရွှင်ရတဲ့သူမရဲ့ ဘဝလေးပေါ့။ သူများအမြင်ကို ဂရုမစိုက်ရာကနေ ဘဝကိုရေစုန်မျှောသွားခဲ့ရတယ်။ ကိုယ့်ဘက်က အမှားတွေလုပ်ပြီးရင်း လုပ်မိနေရာကနေ သူမ ယ်လို ဆက်ဖြစ်သွားမလဲဆိုတာကိုတော့ တွေ့ရမှာပါ။ မကြာခင်ပြသတော့မှာမို့ သာတို့ ကြိုးစားရိုက်ကူးထားတာ အားပေးကြပါဦးလို့ ပြောချင်ပါတယ်”လို့ သူမကဆက်ပြောပါတယ်။
“အမှား (or) Mistake” ဇာတ်လမ်းတွဲကို လာမယ့် စက်တင်ဘာ ၂၈ ရက်ကစပြီး အပတ်စဉ် တနင်္လာနေ့ကနေ သောကြာနေ့အထိ ည ၈ နာရီမှာ Fortune TV ရုပ်သံလိုင်းက ထုတ်လွှင့်သွားမှာဖြစ်ပါတယ်။
