၁၈. ၉. ၂၀၂၃
Written by Peya
လှိုင်သာယာမြို့နယ် ၈၆ ဂိတ်ဟောင်းတွင် ဖယ်ရီကားက မှတ်တိုင်ကို ဝင်တိုက်မိရာမှ ၃ ဦး သေဆုံးပြီး ၅ ဦး ဒဏ်ရာရကြောင်း ဖြစ်စဉ်တွင် ကူညီကယ်တင်ပေးခဲ့သော ကရုဏာတွဲလက်ရှင်ရေးနာရေးကူညီမှုအသင်းမှ တာဝန်ရှိသူတစ်ဦးက MT News သတင်းဌာနသို့ ပြောသည်။
အဆိုပါ ဖြစ်စဉ်မှာ ယနေ့ စက်တင်ဘာ ၁၈ ရက် ညနေပိုင်း ညနေပိုင်း ၅ နာရီကျော်အချိန်ခန့်က ဖြစ်ပွားခဲ့ခြင်း ဖြစ်ပြီး အမျိုးသား ၃ ဦးနှင့် အမျိုးသမီး ၂ ဦး ဒဏ်ရာ ရကာ အမျိုးသား ၁ ဦးနှင့် အမျိုးသမီး ၂ ဦး သေဆုံးကြောင်းလည်း သိရသည်။
“ဘယ်လို ဖြစ်တယ်တော့ မသိပါဘူး။ ယာဉ်တိုက်မှု ဖြစ်တယ်။ လူနာတွေရှိတယ်။ ကူညီကယ်ဆယ်ပေးပါ ဆိုလို့ လှိုင်သာယာမြို့နယ် ပရဟိတအသင်းတွေ စုပေါင်း ကူညီပေးကြတာပါ။ သေဆုံးသူတွေက အောက်က လူတွေ ဖြစ်ဖို့ များပါတယ်။ ဘာလို့လည်း ဆိုတော့ သူက မှတ်တိုင်ကို ဝင်ဆောင့်တာပါ” ဟု အထက်ပါ တာဝန်ရှိသူ က ဆိုသည်။
အဆိုပါ ဖြစ်စဉ်တွင် ယာဉ်တိုက်မှုဖြစ်ပြီး ပိမိသူများ ရှိခဲ့ကြောင်းလည်း ဒေသခံများ၏ ပြောကြားချက်အရ သိရသည်။
