၁၉. ၉. ၂၀၂၃
Written by Ye Kyaw
မြန်မာအမျိုးသားလေကြောင်း(MNA) မှ ရန်ကုန်မြို့ကိုအခြေပြု၍ တရုတ်နိုင်ငံအတွင်းရှိမြို့များနှင့် ကွာလာလမ်ပူ၊ စင်ကာပူ၊ ဟောင်ကောင်၊ အိန္ဒိယနိုင်ငံများသို့ ကုန်ပစ္စည်းသယ်ယူပို့ဆောင်ရေး (Cargo) လေကြောင်းခရီးစဉ်များ ကူးသန်းပြေးဆွဲရန် စီစဉ်ထားကြောင်း သိရသည်။
စက်တင်ဘာ ၁၅ ရက်တွင် မြန်မာအမျိုးသားလေကြောင်း ၏ (၇၅)နှစ်မြောက် စိန်ရတုနှစ်ပြည့်မြောက်သည့် အထိမ်းအမှတ်အနေဖြင့် Boeing 737-400 လေယာဉ်အမှတ် 9M-POS (Flight No. 3G087) Cargo လေယာဉ်အား မလေးရှားနိုင်ငံမှ ရန်ကုန်မြို့သို့ စတင်သယ်ဆောင်လာခြင်းဖြစ်ပြီး အဆိုပါလေယာဉ်ဖြင့် မြန်မာအမျိုးသားလေကြောင်း၏ ကုန်ပစ္စည်းသယ်ယူပိုဆောင်သည့်ခရီးစဉ်များကို ပိုမိုချဲ့ထွင် ပျံသန်းပို့ဆောင်သွားမည်ဖြစ်သည်။
“ပြည်ပဆိုရင် Agent တွေနဲ့ပဲ ချိတ်လို့ရမှာ။ ကျွန်တော်တို့က ပစ္စည်းကိုလက်ခံမယ်။ သူတို့ဆီက လမ်းကြောင်းတွေယူမယ်။ လေယာဉ်ပေါ်တင်မယ်။ အဲဒီလိုပေါ့။ ဟိုနေ့က ရောက်လာတာကတော့ ကုန်စည်ပြေးဆွဲဖို့အတွက် Cargo Flight အသစ်ကြီး ကျွန်တော်တို့ငှားထားတာ။ လောလောဆယ် ခန့်မှန်းခြေကတော့ တစ်ပတ်ကို နှစ်ခေါက်သုံးခေါက်လောက်တော့ ပြေးဆွဲဖို့ရှိတယ်။ အတိအကျတော့ သေချာမသိသေးဘူး။ အခုမှစဆွဲတာဆိုတော့။ ကုန်စည်ပို့ဆောင်ဖို့အတွက်ကတော့ ရန်ကုန်အပြည်ပြည်ဆိုင်ရာ လေဆိပ်မှာဆိုရင် Terminal 3 အဲဒီအနားမှာ MCS (မင်္ဂလာဒုံလေကြောင်းကုန်စည်ဝန်ဆောင်မှု) မှာ စုံစမ်းလို့ရတယ်” ဟု MNA ၏ လေကြောင်းကုန်စည်ပို့ဆောင်ရေး (Cargo) ဌာနမှ တာဝန်ရှိသူတစ်ဦးက ပြောသည်။
မြန်မာနိုင်ငံသို့ လာရောက်ရှိလာသည့် Cargo လေယာဉ်အသစ်သည် ကုန်ပစ္စည်းတန်ချိန် ၁၈ တန်အထိ သယ်ဆောင်နိုင်မည့်အပြင် ပုံမှန်လေကြောင်းခရီးစဉ်တွင်သယ်ဆောင်၍မရသော Dangerous Goods (အန္တရာယ်ရှိသောကုန်ပစ္စည်း)များလည်း ပို့ဆောင်နိုင်မည်ဖြစ်ကြောင်း သိရသည်။
ကိုဗစ်-၁၉ အလွန်ကာလ လေကြောင်းခရီးသွားစီးပွားရေးကဏ္ဍ ပြန်လည်ဖွံ့ဖြိုးတိုးတက်လာသည့် အချိန်ကာလကို ရောက်ရှိပြီဖြစ်သဖြင့် မြန်မာအမျိုးသားလေကြောင်း (MNA) အနေဖြင့် ကုန်စည်ပို့ဆောင်ရေး (Cargo) ခရီးစဉ်များ တိုးချဲ့ပြေးဆွဲရန် နိုင်ငံတော်စီမံအုပ်ချုပ်ရေးကောင်စီ (SAC) ဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က စက်တင်ဘာလ ၁၆ ရက်တွင် ပြုလုပ်သည့် မြန်မာအမျိုးသားလေကြောင်း (MNA) (၇၅) နှစ်မြောက် စိန်ရတုနှစ်ပတ်လည်နေ့ အခမ်းအနား၌ တိုက်တွန်းပြောကြားခဲ့သည်။
