ဂန့်ဂေါ၊ မြင်သားကုန်းရွာအပေါ် လက်နက်ကြီးကျည်ကျရောက်မှုကြောင့် ပြည်သူ ၃ ဦးသေဆုံး

၁၇. ၉. ၂၀၂၃

Written by Nay Moe

မကွေးတိုင်းဒေသကြီး ဂန့်ဂေါမြို့နယ် မြင်သားကျေးရွာအုပ်စု မြင်သားကုန်းရွာမှာ လက်နက်ကြီးကျည်ကျရောက်တာကြောင့် အနည်းဆုံး ပြည်သူ ၃ ဦးအထက်သေဆုံးခဲ့တယ်လို့ ဒေသခံတွေက ပြောပါတယ်။

လက်နက်ကြီးကျည်ကျရောက်မှုဖြစ်စဥ်က မနေ့ည စက်တင်ဘာ ၁၆ ရက် ည ၇ နာရီလောက်မှာဖြစ်ခဲ့တာဖြစ်ပြီး ရွာထဲက အိမ်သုံးလုံးအပေါ်ကို လက်နက်ကြီးကျည်ကျတာကြောင့် အမျိုးသမီးတစ်ဦးအပါအဝင် သုံးဦးသေဆုံးပြီး ကလေးငယ်တွေအပါအဝင် ပြည်သူ ၈ ဦး ထိခိုက်ဒဏ်ရာရခဲ့တာပါ။ ဒီအထဲမှာ ၃ ဦးက စိုးရိမ်ဒဏ်ရာရခဲ့တယ်လို့သိရပြီး နှစ်ဦးထပ်မံကွယ်လွန်တယ်လို့လည်း သိရပေမဲ့လည်း ဒေသခံပြည်သူတွေကထွက်ပြေးနေရတာကြောင့် ထပ်မံသေဆုံးမှု ရှိ မရှိကိုတော့ အတည်မပြုနိုင်ပါဘူး။

ဂန့်ဂေါနယ်ဘက်ဟာ PDF အဖွဲ့တွေများစွာရှိသလို ပြည်သူ့စစ်ရွာတွေလည်း အများအပြားရှိပြီး PDF ရွာတွေနဲ့ ပြည်သူ့စစ်ရွာတွေကြားလည်း အပြန်အလှန်ပစ်ခတ်တိုက်ခိုက်မှုတွေ မကြာခဏဖြစ်နေတဲ့ဒေသပါ။ အဲဒီဘက်မှာ မြင်သားရွာအုပ်စုဟာ PDF တွေအခြေစိုက်စခန်းလည်းရှိနေပြီး ပြီးခဲ့တဲ့ ၂၀၂၁ စက်တင်ဘာလမှာလည်း မြင်သားရွာကို စစ််ကြောင်းထိုးချိန် PDF ၁၀ ဦးထက်မနည်း သေဆုံးခဲ့တဲ့ဖြစ်စဥ်ဖြစ်ပွားခဲ့တယ်လို့ ဒေသတွင်းသတင်းတွေအရ သိရပါတယ်။