၁၈. ၉. ၂၀၂၃
Written By Thandar
ပရိသတ်အားပေးမှုများစွာ ရရှိထားတဲ့ သရုပ်ဆောင် အဆိုတော် ဥက္ကာမင်းမောင်ကတော့ စက်တင်ဘာ ၁၈ ရက်နေ့မှာ ကျရောက်တဲ့ မွေးနေ့အမှတ်တရအနေနဲ့ “Long Long Ago” သီချင်းသစ်က ငါ့ရဲ့ ထူးခြားတဲ့နေ့လေးမှာ မင်းကို ငါ့နှလုံးသားတစ်စုံပေးမယ်ဆိုပါတယ်။
“ကျွန်တော်ရဲ့ ပထမဆုံး ပွဲဦးထွက် English သီချင်းလေးပါ။ ကျွန်တော့် မွေးနေ့ Sept ၁၈ ရက်နေ့မှာ အမှတ်တရအနေနဲ့ ထွက်လိုက်တာပါ။ ကျွန်တော့်ရဲ့ ဒုတိယတေးစီးရီး Album မှာပါမယ့် ပထမဦးဆုံး English လို တစ်ပုဒ်လုံး ဆိုထားတဲ့သီချင်းလေးဖြစ်ပါတယ်။ နှလုံးသားနဲ့ ရေးပြီး သီဆိုထားတာပါ။ မင်းကိုချစ်တဲ့သူတွေအတွက် ငါ့ရဲ့ ထူးခြားတဲ့နေ့လေးမှာ မင်းကို ငါ့နှလုံးသားတစ်စုံပေးမယ်ဆိုတဲ့ အဓိပ္ပါယ်လေးပါ”လို့ အဆိုတော် ဥက္ကာမင်းမောင်က ပြောပါတယ်။
Long Long Ago သီချင်းကို ယနေ့ စက်တင်ဘာ ၁၈ ရက်မှာ iTunes, Spotify, Amazon Music, Apple Music, iHeartRadio, Deezer, Tidal, Facebook, Youtube, Instagram နဲ့ Tik Tok တို့မှာ နားဆင်နိုင်ပြီလည်းဖြစ်ပါတယ်။ ဥက္ကာမင်းမောင်က ဧပြီလ ၁၆ ရက်ကလည်း အဆိုတော် Lဆိုင်းဇီရဲ့ “လှည့်ကြည့်ပါဦး” သီချင်းတစ်ပုဒ်လုံး Lyric Video ကို ပရိသတ်အတွက် တင်ပေးထားတာလည်း ဖြစ်ပါတယ်။ English သီချင်းတွေနဲ့ အမိုက်စား Music Video တွေလည်း ထွက်လာဖို့လည်း ရှိတယ်လို့ဆိုပါတယ်။
“အင်္ဂလိပ်သီချင်းကတော့ International ကို ခြေတစ်လှမ်းဆန့် မြေစမ်းခရမ်းပျိုး ကျွန်တော် ကြိုးစားကြည့်တာပါ။ ဘယ်လောက်အောင်မြင်မှု အတိုင်းအတာမှတ်တိုင်တွေထိ ရောက်မယ် မရောက်ဘူးဆိုတာကတော့ ကျွန်တော့ရဲ့ ကံတရားနဲ့ စန်းပေါ့လေ။ ဒီသီချင်းကို ကမ္ဘာအရပ်ရပ်မှာနေထိုင်တဲ့ ကျွန်တော့်ကိုချစ်သော ပရိသတ်တွေ နားဆင်ပေးပါဦး။ Long Long Ago သီချင်းကို ကျွန်တော်ကိုယ်တိုင်ရေးပြီး မောင်မောင်ပြည့်စုံက တီးခတ်ပေးထားပါတယ်။ ကျွန်တော့်ရဲ့ ကိုယ်တိုင်ရေးဝတ္ထုစာအုပ် “166 Days With You” ရဲ့ ဇာတ်ဝင်တေး ၈ ပုဒ်ထဲက တစ်ပုဒ်လဲဖြစ်ပါတယ်။ ဒီသီချင်း Cover ပုံမှာ ပဟေဠိဖွက်ထားတယ် ”လို့ သူကဆက်ပြောပါတယ်။
သူဟာ သီချင်းတွေနဲ့အတူ အနုပညာလောကကို တစ်ကျော့ပြန် ပြန်လာပြီး မကြာခင် သီချင်းသစ်တွေ၊ ဝတ္ထုစာအုပ်၊ ရုပ်ရှင်၊ New album “Burmese Unokkarn”, Music Video တွေနဲ့ တခြား အနုပညာဖန်တီးမှုတွေကို ဖြေးဖြေးချင်း ပရိတ်သတ်ရှေ့ပြန်လည်ရောက်ရှိလာဖို့ အရင်ကထက်ပိုပြီး အဆပေါင်းများစွာ ကြိုးစားနေတယ် လို့ဆိုပါတယ်။
