၁၈. ၉. ၂၀၂၃
Written by Nay Moe
PDF က စာသင်ကျောင်းဆက်လက်မဖွင့်ရန် လာရောက် ခြိမ်းခြောက်သဖြင့် ကျောင်းသား၊ ကျောင်းသူ ၂၀၀ ခန့် ပညာသင်ကြားနေသည့် သရက်ချောင်းမြို့နယ်ရှိ ရန်တောင်ရွာ မူလတန်းလွန်ကျောင်းအား ယာယီပိတ်ထားရသည်ဟု သိရှိရသည်။
ဖြစ်စဥ်မှာ စက်တင်ဘာ ၁၅ ရက်(သောကြာနေ့) နံနက် ၂ နာရီခွဲအချိန်တွင် တနင်္သာရီတိုင်းဒေသကြီး၊ သရက်ချောင်းမြို့နယ်၊ ရန်တောင်ကျေးရွာရှိ အခြေခံမူလတန်းလွန်ကျောင်းသို့ PDF အင်အား ၆ ဦးခန့်(စိစစ်ဆဲ)က ဆိုင်ကယ် ၃ စီးဖြင့် ရောက်ရှိလာပြီး ကျောင်းအတွင်း ဝင်ရောက်၍ စာသင်ခန်းရှေ့အုတ်နံရံတွင် ခြိမ်းခြောက်စာများအား မှုတ်ဆေးအနီရောင်ဖြင့် ရေးသားကာ စာသင်ခန်းရှေ့ဝရံတာ၌ M 16 ကျည် ၁ တောင့်၊ ၉ လုံးကျည် ၁ တောင့်နှင့် အနီရောင်မှုတ်ဆေးဘူး ၂ ဘူးတို့အား ထားသွားခဲ့ကြောင်း သိရသည်။
“ဖြစ်သွားတာက သောကြာနေ့မနက်ဆိုတော့ အဲဒီနေ့က ပိတ်လိုက်တာပေါ့။ အခုလည်း(တနင်္လာနေ့) မဖွင့်ဘူး။ ဒီဘက်(သရက်ချောင်းမြို့နယ်)မှာက PDF တွေက နေရာအနှံ့သေနတ်လွယ်ပြီးသွားလာနေတာဆိုတော့ လောလောဆယ်ဖွင့်နိုင်ဖို့ကလည်း မသေချာသေးဘူး”ဟု ဒေသခံတစ်ဦးက လက်ရှိအခြေအနေအပေါ် MT News သတင်းဌာနသို့ပြောသည်။
အဆိုပါကျောင်းတွင် ကျောင်းဆရာ၊ ဆရာမ ၁၁ ဦးက ကျောင်းသား၊ ကျောင်းသူ ၁၈၇ ဦးတို့ ပညာသင်ကြားပေးလျက်ရှိပြီး ဖြစ်စဉ်နှင့် ပတ်သက်၍ လုံခြုံရေးအရ ကျောင်းအား ခေတ္တယာယီပိတ်ထားရမှု မှန်ကန်ကြောင်းလည်း မြန်မာနိုင်ငံရဲတပ်ဖွဲ့မှ သိရသည်။
ပြီးခဲ့သည့် စက်တင်ဘာလ ၉ ရက် ည ၇ နာရီ ၄၀ မိနစ်ခန့်ကလည်း ကချင်ပြည်နယ်၊ မိုးမောက်မြို့နယ်၊ ဒေါ့ဖုန်းယန်မြို့၊ အမှတ်(၁)ရပ်ကွက်သို့ KIA အဖွဲ့နှင့် PDF အဖွဲ့တို့က ရှော့တိုက်ဒုံးများဖြင့် ပစ်ခတ်တိုက်ခိုက်ခဲ့မှုကြောင့် အဆိုပါ ရပ်ကွက်ရှိ ဒေါ့ဖုန်းယန်အခြေခံပညာအထက်တန်း ကျောင်းဝင်းအတွင်း ဆရာ၊ ဆရာမများနေထိုင်သည့် နေအိမ်လိုင်းခန်းများအနီးသို့ ရှော့တိုက်ဒုံး တစ်လုံး ကျရောက်ပေါက်ကွဲခဲ့ပြီး ပေါက်ကွဲမှုကြောင့် ၎င်းနေအိမ်လိုင်းခန်းတွင် နေထိုင်သူများဖြစ်ကြသည့် မူလတန်းပြဆရာမဖြစ်သူ ဒေါ်အေးချမ်းဖြိုး (၂၉) နှစ်နှင့် ဒုတိယအလယ်တန်းပြဆရာမဖြစ်သူ ဒေါ်ခင်သန်းဝေ (၃၆)နှစ်တို့တွင် ရှော့တိုက်ဒုံး ပေါက်ကွဲစထိမှန်ဒဏ်ရာများရရှိခဲ့၍ ဆေးကုသနိုင်ရေး ဒေါ့ဖုန်းယန်မြို့ ပြည်သူ့ဆေးရုံသို့ ပို့ဆောင်ထားရှိကြောင်း သိရသည်။
