၁၂. ၉. ၂၀၂၃
Written by Peya
ပဲခူးတိုင်းဒေသကြီး၊ ပြည်မြို့တွင် နေအိမ်ကိုဝင်ခိုးသည့် သူခိုးကို ရပ်ကွက်နေပြည်သူများက ဝိုင်းဝန်းဖမ်းဆီးရာ ပြန်လည်ခုခံသဖြင့် ပြည်သူတစ်ဦး ဒဏ်ရာရသွားကြောင်း မြန်မာနိုင်ငံလူမှုကယ်ဆယ်ရေးအဖွဲ့(ပြည်) မှ တာဝန်ရှိသူတစ်ဦးက MT News သတင်းဌာနသို့ ပြောသည်။
အဆိုပါ ဖြစ်စဉ်မှာ ယနေ့ စတင်ဘာ ၁၂ ရက်၊ နံနက်ပိုင်း ၃ နာရီခွဲအချိန်က ပြည်မြို့၊ ပြည်ရတနာလမ်း၊ ကိုးသိန်းဘုန်းကြီးကျောင်းအနီးရှိ နေအိမ်ကို သူခိုးငါးဦးက ဝင်ခိုးရာ တစ်ဦးကို ဝိုင်း၍ဖမ်းဆီးချိန် ထိုသို့ ဖြစ်ပွားခဲ့ခြင်း ဖြစ်ကြောင်း သိရသည်။
“(အထိုးခံရတဲ့သူက) အရမ်းတော့ မပြင်းထန်ပါဘူး။ ခေါင်းရဲ့ ဦးရေပြားလေး ပြဲသွားတာလောက်ပါပဲ။ တစ်ချက်တော့ချုပ်ရတယ်” ဟု အထက်ပါ တာဝန်ရှိသူက ဆိုသည်။
သူခိုးမှာလည်း ဦးခေါင်းကွဲ ၊ ဘယ်ဘက်ဒူးပြဲလန်ဒဏ်ရာရသွားကာ သူခိုးများ ခိုးခဲ့သည့် ဆိုင်ကယ် (၁)စီး ၊ လက်စွပ် (၁)ကွင်း နှင့် နာရီ (၁)လုံးတို့အားလည်း ပြည်သူများက ပြန်လည်ရရှိခဲ့ကြောင်း ၎င်းက ဆိုသည်။
“ဖမ်းတော့ ဝိုင်းဖမ်းကြရင်းနဲ့ ထွက်ပြေးတာမှာ ဝိုင်းဖမ်းတဲ့သူကို ကတ်ကြေးနဲ့ ပြန်ထိုးတာပါ။ ဘယ်ဘက်နားထင်ကို ထိမိတာပေါ့။ လာခိုးတာက သူခိုးက ငါးယောက်။ တစ်ယောက်ပဲ ကျန်ခဲ့တာပါ။ ပစ္စည်းအကုန် ပြန်ရတယ်” ဟု ၎င်းကဆိုသည်။
