၃. ၉ .၂၀၂၃
Written by Hey Mar
ဆိုင်ကယ်ကို ရှောင်ရာက မီးသတ်ယာဥ်တိမ်းမှောက်မှု မကွေးတိုင်းဒေသကြီး မကွေးမြို့ နတ်မောက်လမ်းပေါ်မှာ ဒီနေ့ စက်တင်ဘာ ၃ ရက် ညနေ ၅ နာရီအချိန်ခန့်က ဖြစ်ပွားခဲ့တယ်လို့ သိရပါတယ်။
မကွေးမြို့၊ နတ်မောက်လမ်း၊ ကံပြားအနောက်စု အနီးမှာ ဖြစ်ပွားခဲ့တာဖြစ်ပြီး အသီးအရွက် အသားငါးအစုံကို ရွာစဥ်တစ်လျှောက် ဆိုင်ကယ်နဲ့ လှည့်လည်ရောင်းချတဲ့ စျေးသည်ဟာ အဆိုပါ ယာဥ်မတော်တဆမှု ဖြစ်စဥ်ကြောင့် ကားအောက်မှာ ပိမိခဲ့ပြီး စိုးရိမ်ရ ဒဏ်ရာတွေ ရရှိခဲ့တယ်လို့ သိရပါတယ်။
“စျေးသည်ဆိုင်ကယ်ကို ရှောင်ရင်းက မီးသတ်ကားမှောက်ပြီး ဆိုင်ကယ်သမားပေါ်ကို ပိတာ။ အသက် ၅၀ ဝန်းကျင် အမျိုးသားပဲ။ အခြေအနေက စိုးရိမ်ရတဲ့ အနေအထားပါ။ ကားအောက်ကနေတော့ အသက်ရှင်လျှက် ကယ်ထုတ်နိုင်ခဲ့ပါတယ်”လို့ သဗ္ဗသုခ ပရဟိတလူမှု့ကူညီရေးအသင်း တာဝန်ရှိသူက ပြောပါတယ်။
ကားအောက်ရောက်နေသူကို အများပြည်သူရဲ့ ဝိုင်းဝန်းကူညီမှုနဲ့ အသက်ရှင်လျှက်ကယ်ထုတ်နိုင်ခဲ့ပြီး မကွေးတိုင်းပြည်သူ့ဆေးရုံကြီးကို သဗ္ဗသုခလူမှုကူညီရေးအသင်းနဲ့ ရောင်စုံမေတ္တာ လူမှုကူညီရေးအသင်းက အရေးပေါ်ကူညီပို့ဆောင်ပေးလိုက်တယ်လို့ သိရပါတယ်။
