၄. ၉. ၂၀၂၃
Written by Nay Moe
ကရင်ပြည်နယ်၊ မြ၀တီခရိုင်ရဲစခန်းကို Federal Wings PDF အဖွဲ့က ဒရုန်းဖြင့် ဗုံးကြဲတိုက်ခိုက်မှုတွင် လုံခြုံရေး တာဝန်ရှိသူ ငါးဦးသေဆုံးကာ ၁၁ ဦးဒဏ်ရာရခဲ့သည်ဟု ကနဦးသတင်းများအရ သိရသည်။
ဖြစ်စဥ်မှာ စက်တင်ဘာ ၃ ရက် ညနေ ၆ နာရီ ၂၀ မိနစ်ခန့်အချိန်တွင် မြ၀တီခရိုင်ရဲစခန်းကို Federal Wings ဒရုန်းတပ်ဖွဲ့က ဒရုန်းဖြင့် ဗုံးကျဲချခဲ့ရာ ၆၀ မမ ဗုံး ၂ လုံးကျရောက်ပေါက်ကွဲခဲ့သည်။ အဆိုပါ ဗုံးကျရောက်မှုကို တပ်နှင့် အထွေထွေအုပ်ချုပ်ရေးဦးစီးဌာန ပူးပေါင်းအဖွဲ့က လာရောက်စစ်ဆေးနေစဉ် ည ၇ နာရီခွဲခန့်တွင် ဒရုန်းဖြင့် ဗုံး ၂ လုံး ထပ်မံ ကျဲချခဲ့သည်။
လူမှုကွန်ရက်တွင် ပျံ့နှံ့နေသော ကြေးနန်းများအရ Federal Wings ၏ အဆိုပါတိုက်ခိုက်မှုတွင် မြ၀တီခရိုင်အုပ်ချုပ်ရေးမှူး ဦးစိုးတင့်၊ အထွေထွေအုပ်ချုပ်ရေးဦးစီးဌာနမှ ဦးစီးအရာရှိ ဦးထွန်းထွန်းညိမ်းနှင့် ထွေ/အုပ်အကြီးတန်းစာရေး ဦးပြည့်ဖြိုးအောင်တို့ ဒရုန်းဗုံးထိမှန်၍ နေရာတွင်ပင် သေဆုံခဲ့သလို ရှေ့တန်းမှူး ဒုတိယဗိုလ်မှူးကြီး အောင်ကျော်မင်းနှင့် ယာဉ်ထိန်းရဲအုပ် နေလင်းစိုးတို့ ပြင်းထန်ဒဏ်ရာဖြင့် မြ၀တီခရိုင်ဆေးရုံကြီးတွင် သေဆုံးခဲ့ကြောင်း သိရှိရသည်။
“မနေ့ညက အဲဒီဖြစ်စဥ်ဖြစ်သွားတာ။ ပေါက်ကွဲသံတွေကတော့ တော်တော့်ကို ကျယ်ပါတယ်။ အခုတော့ မြဝတီမြို့မှာ လုံခြုံရေးတင်းကျပ်ထားတယ်” ဟု ဒေသခံတစ်ဦးက ဆိုသည်။
ဒဏ်ရာရရှိသူများအနက် မြ၀တီခရိုင်မှူး ဒုရဲမှူးကြီး အောက်ထက်ဝင်း၊ ဒုရဲမှူး မျိုးဝင်း၊ ရဲဒုတပ်ကြပ် မျိုးမင်းသော်၊ ဒုရဲမှူး ထွန်းထွန်းနိုင်၊ ဒုရဲအုပ်သက်ခိုင်တို့မှာ ဒဏ်ရာပြင်းထန်သဖြင့် ဆေးကုသမှု ခံယူနေကြောင်း သိရှိရပြီး ကျန် လုံခြုံရေးတာဝန်ရှိသူ ၆ ဦးမှာ မစိုးရိမ်ရ ဒဏ်ရာရရှိခဲ့ကြောင်း သိရသည်။
အဆိုပါဖြစ်စဥ်အပေါ် MT News သတင်းဌာနက ဆက်လက်စုံစမ်းနေပြီး ထပ်မံသိရှိရသည်များကို ဖော်ပြပေးမည်ဖြစ်သည်။
