၂. ၉. ၂၀၂၃
Written by Pan Ei
တစ်ချိန်က အထင်ကရ သရုပ်ဆောင်တွဲဖက်စုံတွဲတစ်တွဲဖြစ်ခဲ့တဲ့ ကမ္ဘာကျော် အက်ရှင်မင်းသား ဂျက်ကီချန်းနဲ့ တောင်ကိုရီးယားက နာမည်ကျော် မင်းသမီး Kim Hee Sun တို့ဟာ ပြီးခဲ့တဲ့ ၁၈ နှစ်က The Myth ရုပ်ရှင်မှာ အတူ တွဲဖက်သရုပ်ဆောင်ခဲ့ပြီး ထပ်မံထွက်ရှိလာဦးမယ့် The Myth 2 မှာလည်း သူတို့ နှစ်ယောက်က ပြန်လည်ပါဝင်ရိုက်ကူးသွားမယ်လို့ သိရပါတယ်။
မနှစ်က ထွက်ရှိခဲ့တဲ့ Tomorrow နဲ့ Remarriage & Desires လိုမျိုး နာမည်ကျော် ဒရမ်မာတွေမှာ ဇာတ်ဆောင်မင်းသမီးအဖြစ် ပါဝင်ရိုက်ကူးခဲ့တဲ့ အသက် ၄၆ နှစ်အရွယ် မင်းသမီး Kim Hee Sun ကို ကိုရီးယားဒရမ်မာပရိသတ်တွေ ရင်းနှီးပြီးသား ဖြစ်မှာပါ။ ၂၀၀၅ ခုနှစ်က ထွက်ရှိခဲ့တဲ့ The Myth ဇာတ်ကားမှာ သူမ ပါဝင်သရုပ်ဆောင်ခဲ့ရတဲ့အကြောင်းအရင်းကတော့ တရုတ်နိုင်ငံမှာ သူမက ရေပန်းစားတာကြောင့်ဖြစ်ပြီး သူမဟာ အဲ့ဒီ ဇာတ်ကားအတွက် မန်ဒရင်းစကားပြောတတ်အောင် သင်ယူခဲ့ရတယ်လို့လည်း သိရပါတယ်။
The Myth ဇာတ်ကားဟာ ကမ္ဘာတဝှမ်းမှာ အမေရိကန်ဒေါ်လာ သန်း ၁၂၀ ကျော်အထိ ဝင်ငွေရရှိခဲ့ပြီး နာမည်ကြီး ရုပ်ရှင်တစ်ကားဖြစ်ခဲ့တာကြောင့် နောက်ဆက်တွဲရုပ်ရှင်ကိုလည်း ပရိသတ်တွေက စောင့်မျှော်လျက်ရှိကြသလို Kim Hee Sun ဟာ ဂျက်ကီချန်းနဲ့ ဒါရိုက်တာ Stanley Tong တို့ရဲ့ အထူးတောင်းဆိုချက်အရ The Myth 2 မှာ ပါဝင်သွားမှာဖြစ်တယ်လို့လည်း မီဒီယာတွေရဲ့ဖော်ပြချက်အရ သိရပါတယ်။
ဂျက်ကီချန်းက The Myth 2 မှာ ရှေးဟောင်းသုတေသနပညာရှင် Jack အဖြစ် ပြန်လည်ပါဝင်လာမှာဖြစ်ပြီး Kim Hee Sun ကတော့ ဘယ်လို အခန်းကဏ္ဍကနေ ပါဝင်လာမလဲဆိုတာ မသိရသေးပါဘူး။
Ref; Koreaboo
