Photo - SBS News
၃.၁၁.၂၀၂၂
Written by Pan Ei
ပီရူးနိုင်ငံတွင် မူးယစ်ဆေးဝါးရောင်းဝယ်သူများကို ဖမ်းဆီးရန် ပီရူးရဲအရာရှိလေးဦးသည် Spider-Man, Captain America, Thor နှင့် Black Widow ဝတ်စုံများဝတ်ပြီး Marvel ဇာတ်ကောင်များအဖြစ် သူတို့ကိုယ်တိုင် အသွင်ပြောင်းလဲဖမ်းဆီးခဲ့ကြောင်း ရဲအရာရှိအဖွဲ့က အင်္ဂါနေ့တွင် သတင်းထုတ်ပြန်ခဲ့သည်။
ရဲအရာရှိများသည် အနီးအနားရှိ ကျောင်းတစ်ကျောင်းတွင် ကလေးများကို ဖျော်ဖြေနေသော ဖျော်ဖြေသူများအဖြစ် အသွင်ယူခဲ့ကြပြီး လူရီဂန်ချိုရပ်ကွက်ရှိ အိမ်တစ်လုံးကို ပစ်မှတ်ထားခဲ့ကာ Spider-Man, Captain America, Thor နှင့် Black Widow ဝတ်စုံများကို ဝတ်ဆင်ခဲ့သည် ။
ရဲများ၏ အဆိုအရ မူးယစ်ဆေးဝါးရောင်းဝယ်သူများသည် အစပိုင်းတွင် Halloween ဟာသတစ်ခု ဖြစ်သည်ဟု ထင်ခဲ့ကြသည် ။
Spider-Man, Captain America, Thor နှင့် Black Widow ဝတ်စုံများကို ဝတ်ဆင်ထားသော ရဲအရာရှိလေးဦးတို့သည် အိမ်တံခါးကို ဖြိုချခဲ့ပြီး အလိုရှိသော မူးယစ်ဆေးဝါးရောင်းဝယ်သူလေးဦးကို ဖမ်းဆီးခဲ့ကာ ကိုကင်းအိတ် ၂၈၇ အိတ်၊ ဆေးခြောက် ၁၂၇ အိတ် နှင့် ကိုကင်းအိတ်အသေး ၃,၂၅၀ အိတ်ကို ဖမ်းဆီးသိမ်းယူခဲ့သည်။
“ဒီအဆောက်အအုံမှာရှိတဲ့ မိသားစုတစ်စုလုံးဟာ မူးယစ်ဆေးဝါး အသေးစားကူးသန်းရောင်းဝယ်ရေးလုပ်နေကြတယ်။ ဒီမူးယစ်ဆေးတွေကို အနီးအနားမှာရှိတဲ့ ပန်းခြံတစ်ခုမှာ ရောင်းချကြပါလိမ့်မယ် ” ဟု ရဲမှူးကြီး ဒေးဗစ်ဗီလာနူဗာက အင်္ဂါနေ့တွင် ပြောကြားခဲ့သည်။
ပီရူးနိုင်ငံတွင် ကိုကင်း ၁ ကီလိုကို အကြမ်းဖျင်းအားဖြင့် ဒေါ်လာ ၆၀၀ ရောင်းချနေပြီး ကိုကင်းအသန့် ၁ ကီလိုကို ဒေါ်လာ ၁၀၀၀ ခန့်ဖြင့် ရောင်းချနေကြသည်။
Ref ; SBS News
