◾️ ရပ်တည်မှုအတွက် အလုပ်တစ်ခုခု ပြန်လုပ်ဆောင်ရမယ်လို့ ပြောလာ
၂၃.၈.၂၀၂၃
Written By Thandar
ကျန်းမာရေးအတွက် Gym တွေကို ပုံမှန်ဆော့ကစားနေတဲ့ အကယ်ဒမီအေးမြတ်သူကတော့ နာမည်ကြီးမင်းသားတစ်ယောက်နဲ့ ဇာတ်လမ်းတွဲပြန်ရိုက်ကူးမှာမို့ စိတ်လှုပ်ရှားနေတယ်လို့ ရင်ဖွင့်လာပါတယ်။
“ဒီလကုန်ရင် Taurus V ထုတ်လုပ်ရေး Hay Application မှာ ပြမယ့်ဇာတ်လမ်းတွဲကို ရိုက်ဖို့ရှိပါတယ်။ အဲဒီမှာ အေးမြတ်သူနဲ့ ဇာတ်လမ်းတွဲရိုက်မယ့်မင်းသားက အားလုံးအံ့သြသင့်သွားပါမယ်။ အေးမြတ်သူအတွက်ကလည်း ဒီဇာတ်လမ်းတွဲလေးက Come Back ပါ။ ဒီမင်းသားအတွက်လည်း Come Back ဖြစ်ပါတယ်။ အေးမြတ်သူနဲ့ရိုက်မယ့် မင်းသားက ဘယ်သူများဖြစ်မလဲဆိုတာ မှော်ဝင်ဖိတ်စာ ဇာတ်လမ်းတွဲထွက်လာရင် အားပေးကြပါဦးလို့။ အားလုံး အံ့အားသင့်ပြီး ဝမ်းသာသွားမယ်လို့ အေးမြတ်သူအနေနဲ့ ယုံကြည်ပါတယ်။ သူက အေးမြတ်သူနဲ့လည်း တွဲပြီး သရုပ်ဆောင်ဖူးပါတယ်ရှင့်။ ပါဝင်ရိုက်ကူးမယ့် ခေါင်းဆောင်မင်းသားကိုယ်တိုင် စိတ်လှုပ်ရှားသလို အေးမြတ်သူကိုယ်တိုင်လည်း စိတ်လှုပ်ရှားပါတယ်ရှင့်” လို့ အကယ်ဒမီ အေးမြတ်သူက ပြောပါတယ်။
“မှော်ဝင်ဖိတ်စာ” ဇာတ်လမ်းတွဲမှာ နာမည်ကြီး မင်းသားတစ်ယောက်နဲ့အတူ အကယ်ဒမီအေးမြတ်သူ၊ အကယ်ဒမီ ခင်ဝင့်ဝါ၊ Lဘောင်နူး၊ ဝင်းခန့်မိုး စတဲ့သူတို့နဲ့ ဒါရိုက်တာ ကောင်းဈာန်က စက်တင်ဘာလဆန်းမှာ စတင်ရိုက်ကူးသွားမယ်လို့ သိရပါတယ်။ အေးမြတ်သူက ဇာတ်ကားရိုက်ကူးမှုတွေ နားထားတာ ကြာပြီမို့ စကားပြောမြန်တတ်သူမို့ စကားပြောရင် မြန်မြန်မပြောမိဖို့ ထိန်းရမယ်လို့ ဆိုပါတယ်။ သူမက ရပ်တည်မှုအတွက် အလုပ်တစ်ခုခုပြန်လုပ်ဆောင်သွားမယ်လို့ ဆိုပါတယ်။
“အေးမြတ်သူ တော်ကီ အရှိန်မြှင့်မပြောရတာ ၅ နှစ်နီးပါးရှိပြီလေ။ ပုံမှန်မဟုတ်တဲ့ အခါကျတော့ Dialogues ဖတ်တဲ့အပိုင်း အဝတ်အစားပြင်ဆင်မှုတွေ ဇာတ်ကောင်စရိုက်ကို ပုံဖော်တဲ့ဟာ အားလုံးအားလုံးက ကြိုဆင်ပြင်ဆင်ပြီး အသေးစိတ်ပြီးပါပြီ။ စကားပြောမြန်မှာကိုတော့ အေးမြတ်သူ ကြောက်တယ်ရှင့်။ ဇာတ်ကောင် ဇာတ်ဝင်စားမှုကြောင့် ကာရိုက်တာ ပီပြင်မယ်လို့ ထင်ပါတယ်။ ဇာတ်လမ်းက ချစ်စရာကောင်းတဲ့ ဇာတ်လမ်း၊ ဇာတ်အိမ်မျိုးပါ”လို့ သူမက ဆက်ပြောပါတယ်။
