MT News
Written by Tha Doe
Distributed Denial of Secrets က ထုတ်ပြန်လိုက်သည့် အင်းဝဘဏ်မှတ်တမ်းဖိုင်များအရ နိုင်ငံတကာဘဏ်များဖြစ်ကြသည့် ANZ, UOB, BIDV ဘဏ်တို့နှင့် မြန်မာ့စီးပွားရေးကော်ပိုရေးရှင်း လက်အောက်ခံ အင်းဝဘဏ်တို့အကြား မြန်မာကျပ်ငွေနှင့် ငွေလွှဲပေးပို့မှုများ ရှိနေသည်ကို တွေ့ရှိခဲ့ရသည်ဟု Justice for Myanmar က ယမန်နေ့က ထုတ်ပြန်သည်။
တပ်မတော်၏ အာဏာရယူမှုကို တုန့်ပြန်သည့်အနေဖြင့် အင်းဝဘဏ်၏ မိခင်ကုမ္ပဏီ၊ မြန်မာ့စီးပွားရေးကော်ပိုရေးရှင်း (MEC) ကို အမေရိကန်ပြည်ထောင်စု၊ ယူကေနှင့် အီးယူတို့က ဒဏ်ခတ်ပိတ်ဆို့မှု ချမှတ်ပြီးနောက်ပိုင်း အရေးပါသည့်နိုင်ငံတကာဘဏ်များက အင်းဝဘဏ်နှင့် ငွေလွှဲပေးပို့မှုတွေ ဆက်လုပ်ခဲ့ကြောင်းကို အဆိုပါမှတ်တမ်းများက ဖော်ပြနေပြီး ယင်းမှတ်တမ်းဖိုင်တွင် ငွေလွှဲမှတ်တမ်းပေါင်း ၂၀,၀၀၀ နီးပါး ရှိနေသည်။
ANZ ဘဏ်သည် ဩစတြေးလျနိုင်ငံ အခြေစိုက်ဖြစ်ပြီး UOB ဘဏ်သည် စင်ကာပူနိုင်ငံအခြေစိုက်ဖြစ်ကာ ဩစတြေးလျနှင့် စင်ကာပူနှစ်နိုင်ငံတို့က မြန်မာ့စီးပွားရေးကော်ပိုရေးရှင်းကို ဒဏ်ခတ်ပိတ်ဆို့မှုချမှတ်ရန် ငြင်းဆိုထားကာ အဆိုပါဘဏ်များကို အင်းဝဘဏ်နှင့် မြန်မာကျပ်ငွေ၊ ငွေလွှဲပေးပို့မှုတွေလုပ်ရန် တရားဝင်ခွင့်ပြုထားသည်ဟုလည်း သိရသည်။ BIDV မှာမူ ဗီယက်နမ်ဘဏ်ဖြစ်သည်။
ထို့ပြင် အင်းဝဘဏ်မှတ်တမ်းများအရ မြန်မာဘဏ်တစ်ခုဖြစ်သည့် ရိုးမဘဏ်နှင့် အကြိမ် ၂၀၀ ကျော် ငွေလွှဲထားမှုများလည်း ပါဝင်သည်။ ရိုးမဘဏ်တွင် နော်ဝေဖွံ့ဖြိုးရေးဆိုင်ရာ ဘဏ္ဍာရေးအဖွဲ့အစည်းဖြစ်သည့် Norfund၊ စင်ကာပူနိုင်ငံပိုင် ဓနရံပုံငွေနှင့် ကမ္ဘာ့ဘဏ်အုပ်စု၏ အပြည်ပြည်ဆိုင်ရာဘဏ္ဍာရေးကော်ပိုရေးရှင်း (IFC) တို့သည် ရိုးမဘဏ်တွင် ရင်းနှီးမြှုပ်နှံသူများလည်း ဖြစ်နေသည်။
ထို့အတွက် အဆိုပါ ဘဏ်များအနေဖြင့် အင်းဝဘဏ်နှင့် ငွေလွှဲလုပ်ငန်းဆိုင်ရာဆက်နွှယ်မှုများကို ဖြတ်တောက်စေလိုကြောင်းလည်း Justice for Myanmar က ဖော်ပြထားသည်။
Justice For Myanmar ၏ ပြောရေးဆိုခွင့်ရှိသူ မရတနာမောင်က “ANZ, UOB နဲ့ BIDV တို့အနေနဲ့ သူတို့ရဲ့နိုင်ငံတကာလူ့အခွင့်အရေးတာဝန်တွေနဲ့အညီ အင်းဝဘဏ်နဲ့ ဆက်ဆံရေးကို ချက်ချင်းအဆုံးသတ်တာ၊ ဒါမှမဟုတ် မြန်မာနိုင်ငံကနေထွက်ခွါတာကို မဖြစ်မနေ လုပ်ကြရပါမယ်” ဟု ပြောသည်။
