၁၉. ၈. ၂၀၂၃
Written by Pan Ei
နာမည်ကျော် ပေါ့ပ်ကြယ်ပွင့်တွေဖြစ်တဲ့ Miley Cyrus နဲ့ Selena Gomez တို့ဟာ လာမယ့် ဩဂုတ်လ ၂၅ ရက်၊ သောကြာနေ့မှာ ပရိသတ်တွေစောင့်မျှော်နေကြတဲ့ သီချင်းသစ်တွေကို ထုတ်ကြတော့မယ်လို့ သိရပါတယ်။
အခုနှစ်ထဲမှာ Flower သီချင်းနဲ့ ပရိသတ်တွေရင်ထဲကို ပြန်ဝင်ရောက်လာခဲ့တဲ့ Miley Cyrus နဲ့ လများစွာ ကြာမှ သီချင်းသစ်ထုတ်မယ့် Selena Gomez တို့ရဲ့ သီချင်းသစ်တွေကို ပရိသတ်တွေက စောင့်မျှော်နေကြသလို သူတို့ ကြယ်ပွင့်နှစ်ဦးစလုံးဟာလည်း အချင်းချင်း အပြန်အလှန် အားပေးနေလျက်ရှိပါတယ်။
သူတို့နှစ်ယောက်ရဲ့ ဆယ်ကျော်သက်အရွယ်က တီဗီရှိုးတွေဖြစ်တဲ့ Hannah Montana နဲ့ Wizards of Waverly Place တို့ကို ၂၀၀၀ ခုနှစ် အစောပိုင်းကာလတွေတုန်းက Disney ကနေ ထုတ်လွှင့်ခဲ့တာဖြစ်ပြီး အခုချိန်မှာတော့ အသက် ၃၁ နှစ် ရှိပြီဖြစ်တဲ့ Selena Gomez က “Miley Cyrus နဲ့ ကျွန်မဟာ မကြာခင်မှာပဲ သီချင်းသစ်ထုတ်ကြတော့မှာပါ။ ကျွန်မတို့ဟာ ငယ်ငယ်ကတည်းက သူငယ်ချင်းတွေပါ”လို့ သူမရဲ့ အင်စတာဂရမ် အကောင့် Story မှာ တင်ခဲ့သလို Miley Cyrus ကလည်း အင်စတာဂရမ် အကောင့် Story မှာ ပိုစ့်တင်ကာ အချင်းချင်း အပြန်အလှန် အားပေးခဲ့ပါတယ်။
လာမယ့် ဩဂုတ်လ ၂၅ ရက်၊ သောကြာနေ့မှာ ထွက်ရှိမယ့် Miley Cyrus ရဲ့ သီချင်းသစ်နာမည်ကတော့ Used to be Young ဖြစ်ပြီး Selena Gomez ရဲ့ သီချင်းသစ်ကတော့ Single Soon ဖြစ်ပါတယ်။
Ref; People
