၁၇. ၈. ၂၀၂၃
Written by Nyein Kyaw
မာရဝိဇယ ဗုဒ္ဓရုပ်ပွားတော်မြတ်ကြီးအား အနယ်နယ်အရပ်ရပ်မှ ရဟန်း၊ ရှင်လူ ဘုရားဖူးပြည်သူများ အခမဲ့ လာရောက်ဖူးမြော် ကြည်ညိုနိုင်ရန် ဩဂုတ်လ ၂၀ ရက်အထိ ရက်ထပ်မံတိုးမြှင့် ဖွင့်လှစ်ပေးသွားမည်ဖြစ်ကြောင်း နိုင်ငံတော်စီမံအုပ်ချုပ်ရေးကောင်စီ (SAC)၏ သတင်းထုတ်ပြန်ရေးအဖွဲ့မှ ယနေ့ ဩဂုတ်လ ၁၇ ရက်တွင် ထုတ်ပြန်ထားသည်။
မာရဝိဇယဗုဒ္ဓရုပ်ပွားတော်မြတ်ကြီးအား အခမဲ့ဖူးမြော်ခွင့်ကို ဩဂုတ်လ ၈ ရက်မှ ၁၆ ရက်အထိ သတ်မှတ်ပေးထားသော်လည်း ဩဂုတ်လ ၁၉ ရက်အထိ ထပ်မံတိုးမြှင့်ပေးခဲ့သည့်အပြင် ယနေ့တွင်မူ ဘုရားကြီးအား အခမဲ့ဖူးမြော်ခွင့်ကို ဩဂုတ်လ ၂၀ ရက်အထိ ထပ်မံတိုးမြှင့် ခွင့်ပြုပေးခဲ့ခြင်းဖြစ်သည်။
မာရဝိဇယဗုဒ္ဓရုပ်ပွားတော်မြတ်ကြီးအား အခမဲ့ဖူးမြော်ခွင့်ပေးထားသည့်ရက်ကျော်လွန်ပါက ဝင်ရောက် လေ့လာဖူးမြော်သူများကို ဝင်ကြေးကောက်ခံသွားမည်ဖြစ်ပြီး လူကြီးတစ်ဦးလျှင် ကျပ် ၁,၀၀၀ ၊ ကလေး တစ်ဦးလျှင်(ရင်ခွင်ပိုက်မပါ) ကျပ် ၁,၀၀၀၊နိုင်ငံခြားသားတစ်ဦးလျှင် ၁၀ ဒေါ်လာ၊ အပျော်ရိုက်ကင်မရာအတွက် ကျပ် ၅,၀၀၀၊ အလှရိုက်ဓာတ်ပုံ/Video (Pre-Wedding)အပါ ကျပ် ၅၀,၀၀၀(နာရီဝက်ပိုတိုင်း ကျပ် ၅,၀၀၀)၊ ယာဉ်ဝင်ခွင့်တစ်စီးလျှင်(ကား Parking အထိ) ကျပ် ၂၀,၀၀၀ နှင့် Buggy တစ်စီးလျှင် (လေးယောက်စီး) တစ်နာရီ ကျပ် ၁၀,၀၀၀ ကျပ်ဖြင့် ကောက်ခံသွားမည်ဖြစ်ကြောင်း ထုတ်ပြန် ထားသည်။
