၁၅.၈.၂၀၂၃
Written By Thandar
ပရိသတ်အားပေးမှုကို အခိုင်အမာရရှိထားတဲ့ မင်းသမီး အကယ်ဒမီ စိုးပြည့်သဇင်ကတော့ အချစ်မရှိလည်း အထီးမကျန်ပါဘူးလို့ ရင်ဖွင့်လာပါတယ်။
“စိုးပြည့်က မင်းကောင်းမင်းမြတ် ရုပ်ရှင်ဇာတ်ကားမှာလည်း ပရိသတ်တွေ မြင်တွေ့နေကြမဟုတ်တဲ့ပုံစံနဲ့ ပါဝင်သရုပ် ဆောင်ရမှာပါ။ စိုးပြည့်က သရုပ်ဆောင်တစ်ယောက်ဖြစ်ပေမယ့် အေးအေးချမ်းချမ်းနေရတာ သဘောကျတယ်။ အရမ်းကြီး လှုပ်လှုပ်ခတ်ခတ်ကိုလည်း သဘောမကျတတ်ပါဘူး။ အရင်က ပုံတင်ရုံလောက်ပဲ သုံးဖြစ်တယ်။ ခုနောက်ပိုင်းမှာ Online Social Media ကို ပိုသုံးဖြစ်လာတာပါ။ စိုးပြည့်က အလုပ်ကိစ္စဖြစ်တဲ့ ကိုယ့်အထည်တွေရောင်းတာတို့ ဘာတို့လောက်မှပဲ ခုနောက်ပိုင်း Social Media သုံးလာတယ်”လို့ အကယ်ဒမီ စိုးပြည့်သဇင်က ပြောပါတယ်။
သူမကတော့ လက်ရှိ အနုပညာအလုပ်တွေ လုပ်ရတာ ပျော်ရွှင်နေသလို မိသားစုနဲ့အတူ ဘဝကိုဖြတ်သန်းနေရတာလည်း ပျော်ရွှင်နေတယ်လို့ ဆိုပါတယ်။ အနုပညာသမားဆိုပေမယ့် အနုပညာအလုပ်တစ်ခုထဲနဲ့ ရပ်တည်ရတာ အဆင်မပြေတဲ့အတွက် အသက်အရွယ် အပိုင်းအခြားတစ်ခုအတွက် တစ်ဖက်က Soe Pyae – Silk & Lace စီးပွားရေး လုပ်ကိုင်နေတယ်လို့ ဆိုပါတယ်။
“စိုးပြည့် အချစ်ရေးပိုင်းမှာလည်း စိုးပြည့် သိပ်ပြောလေ့ပြောထ မရှိဘူး၊ ပရိသတ်တွေက သူတို့ချစ်တဲ့ အနုပညာရှင်တစ်ယောက်ဆိုရင် အချစ်ရေးကိုလည်း စိတ်ဝင်စားကြတာပဲလေ။ အနုပညာရှင်ဆိုရင် ဘယ်အရေးမဆို စိတ်ဝင်စားတာပဲလေ။ စိုးပြည့်ရဲ့ အသက်အရွယ်လေး တစ်ခုရောက်လာတော့ ပရိသတ်က သိချင်ကြတယ်။ တစ်ဦးတည်း သမီးဖြစ်ပေမယ့် စိုးပြည့် အထီးမကျန်ပါဘူး။ စိုးပြည့်ချစ်တဲ့ မိဘတွေ၊ စိုးပြည့် Fans တွေလည်း ရှိတယ်လေ။ လက်ရှိအချိန်မှာ စီးပွားရေးတွေလည်း လုပ်နေတာ့ အဆင်ပြေတယ်။ အချစ်မရှိလည်း စိုးပြည့် အထီးမကျန်ပါဘူး”လို့ သူမက ဆက်ပြောပါတယ်။
စိုးပြည့်သဇင်ကတော့ “မင်းကောင်းမင်းမြတ်” ရုပ်ရှင်ဇာတ်ကားကြီးမှာလည်း နေထက်လင်း၊ သုတအောင်၊ ဘုန်းလျှံ၊ ဘရန်မ်ဒိုလီ၊ ပိုင်စစ်မှူး၊ ဆင်မ၊ မိုးညို၊ မျိုးစန္ဒီကျော်၊ ခိုင်နှင်းဝေ၊ အိမ့်ချစ်ချစ်၊ လင်းလက်ခွန်ချို၊ မာဂရက်၊ နန်းဝေဝေမြင့်တို့နဲ့အတူ ပါဝင်သရုပ်ဆောင်ထားတယ်လို့ ဆိုပါတယ်။
