၁၂. ၈. ၂၀၂၃
Written by Pan Ei
နာမည်ကြီး ဟောင်ကောင်မင်းသား Donnie Yen ရဲ့ သမီး Jasmine Yen က သူမရဲ့ အဖေက နာမည်ကြီး အက်ရှင်ရုပ်ရှင်တွေရဲ့ အိုင်ကွန်တစ်ဦးဖြစ်ပေမဲ့ သူမကတော့ မတူညီတဲ့အနုပညာပုံစံဖြစ်တဲ့ ဂီတပိုင်းမှာ သူမရဲ့လမ်းကြောင်းကို ပုံဖော်လျှောက်လမ်းနေကာ အနုပညာ ပွဲဦးထွက်အနေနဲ့ မကြာသေးမီက စင်ကာပူနိုင်ငံမှာ ဖျော်ဖြေခဲ့ပါတယ်။
အသက် ၁၉ နှစ်ရှိပြီဖြစ်တဲ့ Jasmine Yen ဟာ ပြီးခဲ့တဲ့ ဇူလိုင်လတုန်းက Sony Music Entertainment ရဲ့ ဌာနခွဲတစ်ခုဖြစ်တဲ့ RCA Records China နဲ့ လက်မှတ်ရေးထိုးခဲဲ့ပြီး Idk (I don’t Know Why This Isn’t Work) အမည်ရှိတဲ့ သီချင်းကို ဇူလိုင်လ ၂၈ ရက်နေ့မှာ စတင်ဖြန့်ချိခဲ့ကာ မကြာသေးမီက Singapore’s Majulah Music Night မှာ ပထမဆုံးအကြိမ်အဖြစ် ဖျော်ဖြေခဲ့တာဖြစ်ပါတယ်။
သူမ အသက် ကိုးနှစ်အရွယ်တုန်းက အဒေါ်ရဲ့မင်္ဂလာပွဲမှာ လူပေါင်း ၂,၀၀၀ ရှေ့ သီချင်း သီဆိုခဲ့တဲ့ချိန်ကစပြီး စင်မြင့်ရဲ့ ပထမဆုံးအရသာကို ရရှိခဲ့တာဖြစ်သလို ဒါတင်မကသေးဘဲ သူမ အသက် ၁၄ နှစ်ရောက်တဲ့အခါ ဂီတကို အလေးအနက်ထားလုပ်ကိုင်ဖို့ ဆုံးဖြတ်ခဲ့ပါတယ်လို့ သူမက ပြောကြားခဲ့ပါတယ်။
Jasmine Yen မိခင် Cissy Wang ဟာ သူမရဲ့ ပထမဆုံး ဖျော်ဖြေပွဲကို လာရောက်အားပေးခဲ့သလို သူမရဲ့အင်စတာဂရမ်အကောင့်ကနေတစ်ဆင့် သမီးဖြစ်သူရဲ့ ပွဲဦးထွက်အတွက် ဂုဏ်ပြုစကားပြောကြားခဲ့ပြီး သူမရဲ့ ဖခင် Donnie Yen ကလည်း Cissy Wang ရဲ့ ပိုစ့်တွေကို Storyမှာ ပြန်လည်ဝေမျှခဲ့ပါတယ်။
Jasmine Yen ရဲ့ ပွဲဦးထွက်အယ်လ်ဘမ်ဟာ လာမယ့် စက်တင်ဘာ ၁ ရက်မှာ ထွက်ရှိမှာဖြစ်ပြီး အဲ့ဒီအယ်လ်ဘမ်ထဲမှာ သီချင်း ရှစ်ပုဒ် ပါဝင်သွားမှာဖြစ်သလို Yen ကတော့ သူမက ဘယ်သူဖြစ်တယ်ဆိုတာကို ကိုယ်စားပြုပေးမယ့် ဂီတကိုဖန်တီးဖို့ပဲ အာရုံစိုက်ထားပါတယ်လို့ ထပ်လောင်း ပြောကြားခဲ့ပါတယ်။
Ref; Asia One
