ဓာတ်ပုံ - သာကေတမြို့နယ် လူမှုကူညီရေးအသင်း
MT News
Written by Hey Mar
ရန်ကုန်တိုင်းဒေသကြီး သာကေတမြို့နယ် မြင်တော်သာလမ်းမကြီးရဲ့ ဘုရားလမ်းထိပ်က ဓာတ်တိုင်မှာ တပ်ဆင်ထားတဲ့ Wifi ကြိုးကို တက်ရောက်ပြုပြင်ရင်း အမျိုးသား သုံးဦးဓာတ်လိုက်ခံရတဲ့ ဖြစ်စဥ် ဒီနေ့ သြဂုတ် နှစ်ရက် ညနေ ၄ နာရီခန့်က ဖြစ်ပွားခဲ့ကြောင်း သာကေတလူမှုကူညီရေးအသင်းကနေသိရပါတယ်။
“ဘယ်လိုဖြစ်သွားတာလဲဆိုတော့ လမ်းထဲက အိမ်တစ်အိမ်က ဝိုင်ဖိုင်ပျက်လို့ သူတို့တပ်ထားတဲ့ ကုမ္ပဏီကို လှမ်းခေါ်ပြီး ဝန်ဆောင်မှုယူတာ။ ကုမ္ပဏီက ဝန်ထမ်းကောင်လေး သုံးဦးလာတယ်။ နှစ်ဦးက ဓာတ်တိုင်မှာ တပ်ထားတဲ့ Wifi Box က ကြိုးကိုတက်ပြင်တယ်။ ကျန်တဲ့ တစ်ဦးက ဝိုင်ဖိုင်ပျက်လို့ခေါ်တဲ့အိမ်ထဲကနေ ပြင်ပေးတယ်။ အဲ့ဒီမှာ ဓာတ်တိုင်ပေါ်က နှစ်ယောက် ဓာတ်လိုက်တော့ သူကလည်း အိမ်ထဲမှာ လျှပ်စစ် စီးကြောင်းဝင်ပြီး ဓာတ်လိုက်နေတာ” လို့ ကူညီပေးခဲ့တဲ့ သာကေတလူမှုကူညီကယ်ဆယ်ရေးအသင်း တာဝန်ရှိသူက ဆိုပါတယ်။
ဓာတ်လိုက်မှုကြောင့် ဓာတ်တိုင်ပေါ်က ဒဏ်ရာရရှိသူ အသက်(၂၀)ဝန်းကျင်ခန့် လူနာအမျိုးသား(၂)ဦးမှာ ပြုတ်ကျတဲ့အရှိန်ကြောင့် လက်ကျိုးဒဏ်ရာ၊ ဓာတ်လိုက်ခံရတာကြောင့် အရေပြားလောင်ကျွမ်းတဲ့ဒဏ်ရာနဲ့ မေးစေ့ကွဲဒဏ်ရာတွေ ရရှိခဲ့ပြီး အိမ်ထဲမှာပြုပြင်နေတဲ့ အသက်(၄၀)ဝန်းကျင်ခန့် အမျိုးသားလူနာ(၁)ဦးကတော့ ခန္ဓာကိုယ်အောက်ပိုင်း ထုံကျင် ဝေဒနာတွေ ခံစားခဲ့ရတယ်လို့ သိရပါတယ်။
ဒဏ်ရာရရှိသူတွေကို မြေပြင်ပြုစုကုသမှုပေးပြီး ပေးဆပ်သူတို့နှလုံးသားပရဟိတအသင်း၊ အောင်သပြေလူမှုကူညီရေးအသင်း လူနာတင်ယာဉ်တွေနဲ့ စံပြဆေးရုံသို့ ပို့ဆောင်ကူညီပေးခဲ့တယ်လို့ သိရပါတယ်။
ဓာတ်ပုံ – သာကေတမြို့နယ် လူမှုကူညီရေးအသင်း
