၃. ၈. ၂၀၂၃
Written by Min Mahar
ဥယျာဥ်ခြံအတွင်း မိသားစုဝင် သုံးဦးနေထိုင်သည့် နေအိမ်အား PDF တစ်ဦးရောက်လာပြီး ညအိပ်ခွင့်တောင်းရာ မပေးနေသည့်အတွက် သေနတ်ဖြင့်ပစ်ခတ်ခဲ့သဖြင့် မိဘနှစ်ဦးသေဆုံးပြီး သားဖြစ်သူဒဏ်ရာရှိမှုတစ်ခု ဘုတ်ပြင်းမြို့နယ်တွင် ဩဂုတ်လ ၁ ရက်နေ့ညပိုင်းက ဖြစ်ပွားခဲ့ကြောင်း ဒေသခံသတင်းရင်းမြစ်များထံမှ သိရသည်။
ဖြစ်စဉ်မှာ ဩဂုတ်လ ၁ ရက်နေ့(ဒုတိယဝါဆိုလပြည့်နေ့)ည ၉ နာရီ ၃၀ မိနစ်ခန့်က တနင်္သာရီတိုင်းဒေသကြီး၊ ဘုတ်ပြင်းခရိုင်၊ဘုတ်ပြင်းမြို့နယ် အတွင်းဘုတ်ပြင်းကျေးရွာအုပ်စု၊ ထောင်မွန်ကျေးရွာရှိ ဥယျာဉ်ခြံထဲတွင်နေထိုင်သည့် အသက် ၆၈ နှစ်အရွယ်အမျိုးသားနှင့် အသက် ၅၈ နှစ်အရွယ်လင်မယားနှစ်ဦးနှင့်အတူ အသက် ၂၄ နှစ်အရွယ်သားဖြစ်သူတို့ ၃ ဦးသည် နေအိမ်အတွင်းရှိနေစဉ် PDF အဖွဲ့မှ အမည်မသိ အရပ်ဝတ်ဖြင့် ဝတ်ဆင်ထားသော အမျိုးသားတစ်ဦးရောက်ရှိလာကာ နေအိမ်၌ တစ်ညတည်းခိုခွင့်ပေးရန် ခွင့်တောင်းခဲ့သည်။ ဖခင်ဖြစ်သူမှကြောက်သဖြင့် သက်ဆိုင်ရာကို အကြောင်းကြားပြီးမှနေထိုင်ခိုင်းမည်ဆိုရာတွင် ၎င်းမှအကြောင်းမကြားရန်ပြောဆိုခဲ့သောကြောင့် ဖခင်ဖြစ်သူက နေအိမ်၌တည်းခိုခွင့်မပေးခဲ့ရာမိသားစုဝင်သုံးဦးလုံးကို သေနတ်ဖြင့် ပစ်ခတ်သွားပြီးထွက်ပြေးသွားကြောင်း ဒဏ်ရာရရှိသည့်သားဖြစ်သူ ပြောပြချက်အရ သိရသည်။
အဆိုပါသေနတ်ဖြင့်ပစ်ခတ်ခဲ့မှုကြောင့် မိဘနှစ်ဦးစလုံးသေဆုံးသွားခဲ့ပြီး သားဖြစ်သူမှာမူ ဒဏ်ရာများရရှိခဲ့သဖြင့် ဒေသခံလူမှုကူညီရေးအသင်းမှ မော်တော်ယာဉ်ဖြင့် ဘုတ်ပြင်းမြိုနယ်ဆေးရုံသို့ ပို့ဆောင်ပေးခဲ့ရာ မြိတ်မြိုဆေးရုံသို့ တင်ပို့ဆေးဝါးကုသမှရမည်ဖြစ်သောကြောင့် ထပ်မံပို့ဆောင်ပေးခဲ့ပြီး ဆေးဝါးကုသမှုခံယူနေကြောင်း ကူညီ ဆောင်ရွက်ပေးရာတွင် ပါဝင်သည့် လူမှုကူညီရေးအသင်းမှ အဖွဲ့ဝင်တစ်ဦးက MT News သတင်းဌာနသို့ ပြောပြသည်။
သက်ဆိုင်ရာတာဝန်ရှိသူများမှလည်း သေနတ်ဖြင့်ပစ်ခတ်သူကို နယ်မြေခံရဲစခန်းတွင် အမှုဖွင့်ထားပြီး အမြန်ဆုံးဖမ်းဆီးရမိရေးအတွက် လိုက်လံစုံစမ်းစစ်ဆေးနေကြကြောင်းလည်း သိရသည်။
