ဓာတ်ပုံ - ဦးလှမိုး(တာချီလိတ်)ပရဟိတအသင်း
၂၀. ၇. ၂၀၂၃
Written by Hey Mar
ရှမ်းပြည်နယ် အရှေ့ပိုင်း၊ တာချီလိတ်မြို့၊ မြို့အထွက် ဗျူဟာကုန်း အဆင်းမှာ ကားတစ်စီးက လမ်းဘေးဆုတောင်းစား သုံးဦးကို တိုက်ပြီးထွက်ပြေးသွားတာကြောင့် နှစ်ဦး သေဆုံးခဲ့တဲ့ ဖြစ်စဉ် မနေ့က ဇူလိုင်လ ၁၉ ရက် ည ၁၁ နာရီဝန်းကျင်မှာ ဖြစ်ပွားခဲ့တယ်လို့ သွားရောက်ကူညီခဲ့တဲ့ ဦးလှမိုးတာချီလိတ်ပရဟိတအသင်းကနေ သိရပါတယ်။
ယာဉ်တိုက်မှုကြောင့် လမ်းဘေးမှာ တောင်းရမ်းစားသောက်ပြီး အိမ်ခြေမဲ့နေထိုင်တဲ့ လင်မယားနှစ်ဦး နေရာတင် ပွဲချင်းပြီး သေဆုံးသွားခဲ့ပြီး၊ ကျန် အမျိုးသားတစ်ဦးကတော့ သတိမေ့ကာ ပွန်းပဲ့ဒဏ်ရာတွေရရှိခဲ့တယ်လို့ ဦးလှမိုးတာချီလိတ်ပရဟိတအသင်းက တာဝန်ရှိသူက ပြောပါတယ်။
တိုက်သွားတဲ့ကားကို အမျိုးအစားရော အရောင်ပါသေချာ မသိလိုက်ရဘဲ သက်ဆိုင်ရာတာဝန်ရှိသူတွေက ဆက်လက်စုံစမ်းစစ်ဆေးတာတွေ ပြုလုပ်နေတယ်လို့ သိရပါတယ်။
ရုပ်အလောင်းတွေကိုတော့ ဦးလှမိုးတာချီလိတ်ပရဟိတ အသင်းပိုင်နိဗ္ဗာန်ယာဉ်နဲ့ စနစ်တကျသယ်ဆောင်ကာ တာချီလိတ်ပြည်သူ့ဆေးရုံကြီး ရင်ခွဲရုံကို ပို့ဆောင်ပေးခဲ့တယ်လို့ သိရပါတယ်။
ဓာတ်ပုံ – ဦးလှမိုး(တာချီလိတ်)ပရဟိတအသင်း
