၂၀. ၇. ၂၀၂၃
Written by Min Mahar
နည်းပညာတက္ကသိုလ်(မုံရွာ)အား PDF ငါးဦးက လာရောက်ပစ်ခတ်ခဲ့သဖြင့် လုံခြုံရေးတပ်ဖွဲ့ဝင်များကပြန်လည်ပစ်ခတ်ခဲ့မှု ယမန်နေ့မနက်ပိုင်းက ဖြစ်ပွားခဲ့ကြောင်း ဒေသခံသတင်းရင်းမြစ်များထံမှ သိရသည်။
ဖြစ်စဉ်မှာ ယမန်နေ့(ဇူလိုင်လ ၁၉ ရက်နေ့)မနက် ၁၁ နာရီ ၄၀ မိနစ်ခန့်က စစ်ကိုင်းတိုင်းဒေသကြီး၊ မုံရွာမြို့နယ်၊ ဆည်ကြီးတောကျေးရွာအနီးရှိ နည်းပညာတက္ကသိုလ်(မုံရွာ) ကျောင်းပေါက်ဝကို PDF အဖွဲ့မှလူ ၅ ဦးခန့်က လက်လုပ်အာပီဂျီဖြင့် ၂ ချက်၊ လက်နက်ငယ်အတွဲလိုက်အချက် ၂၀ ခန့် ပစ်ခတ်ခဲ့ရာ ကျောင်းပေါက်ဝ၌ လုံခြုံရေးတာဝန်ထမ်းဆောင်နေသော ပူးပေါင်းလုံခြုံရေးတပ်ဖွဲ့ဝင်များကလည်း ပြန်လည်ပစ်ခတ်ခဲ့ရာ မြောက်အရပ်ရှိ မိုးညှင်းသမ္ဗုဒ္ဓေဘုရားဘက်သို့ ထွက်ပြေးသွားခဲ့ကြောင်း သိရသည်။
အဆိုပါပစ်ခတ်ခဲ့မှုကြောင့် ကျောင်းရှေ့မျက်နှာစာ လှေကားအား အာပီဂျီ ထိမှန်ခဲ့သော်လည်း လူထိခိုက်မှုတစ်စုံတစ်ရာရရှိခဲ့ခြင်း မရှိခဲ့ကြောင်း လုံခြုံရေးတပ်ဖွဲ့ဝင်များနှင့်နီးစပ်သူတစ်ဦးထံမှ သိရသည်။
ယင်းနည်းပညာတက္ကသိုလ်(မုံရွာ)အား ဇွန်လ ၁ ရက်နေ့တွင် စတင်၍ဖွင့်လှစ်ခဲ့ရာ ကျောင်းသား/သူ ၁၅၀ ဦးခန့်တက်ရောက်ပညာသင်ကြားနေကြောင်း နည်းပညာတက္ကသိုလ်(မုံရွာ)ပါမောက္ခချုပ် ဒေါက်တာ အောင်မျိုးလင်း၏ ပြောပြချက်အရ သိရသည်။
