MT News
Written by Tha Doe
ပြည်တွင်းရွှေစျေးကွက်အတွင်း စံချိန်တင်အဖြစ် ရွှေတစ်ကျပ်သား ကျပ် ၃၈ သိန်းအထိ ဖြစ်ပေါ်လာပြီးနောက် နိုင်ငံတော်စီမံအုပ်ချုပ်ရေးကောင်စီ၏ သတ္ထုတွင်းဝန်ကြီးဌာနက စက်တင်ဘာ ၅ ရက်မှ စတင်ကာ ရွှေဒင်္ဂါးပြားများ ရောင်းချပေးခဲ့သဖြင့် ပြည်တွင်းရွှေစျေးနှုန်းမှာ ကျပ် ၃၁ သိန်းဝန်းကျင်၌ အတက်အဆင်းဖြစ်ပေါ်နေကြောင်း ပြည်တွင်းရွှေစျေးကွက်အတွင်း အရောင်းအဝယ်ဖြစ်မှုများအရ သိရသည်။
စက်တင်ဘာ ၅ ရက်တွင် SAC က ရွှေတစ်ကျပ် ကျပ် ၂၉ သိန်းခွဲဖြင့် ရောင်းချပေးခဲ့ရာ ပြည်တွင်းရွှေကွက်တွင် ရွှေတစ်ကျပ်သားလျှင် ကျပ် ၃၀၅၀၀၀၀ နှင့် ကျပ် ၃၁ သိန်းအကြား အတက်အဆင်းဖြင့် အရောင်းအဝယ်ဖြစ်ခဲ့ပြီးနောက် စက်တင်ဘာ ၆ ရက်တွင် SAC က ကျပ် ၂၈ သိန်းခွဲဖြင့် ရောင်းချခဲ့သဖြင့် ပြည်တွင်းရွှေစျေးကွက်အတွင်း ကျပ် ၃၁၁၀၀၀၀ ခန့်ဖြင့် အရောင်းအဝယ်ဖြစ်ပေါ်ခဲ့သည်။ စက်တင်ဘာ ၇ ရက်တွင် အဖွင့်စျေးတွင် ရွှေတစ်ကျပ်သား ၃၁၃၀၀၀၀ ခန့်ဖြင့် အရောင်းအဝယ်ဖြစ်ပေါ်ခဲ့ပြီး ညနေစျေးတွင် ကျပ် ၃၁ သိန်းဖြစ်ပေါ်ခဲ့သည်။ စက်တင်ဘာ ၈ ရက်အဖွင့်စျေးတွင် ရွှေတစ်ကျပ်သား ၃၁၁၀၀၀၀ ခန့်ဖြင့် အရောင်းအဝယ်ဖြစ်ခဲ့ပြီး ညနေစျေးတွင် ၃၁ သိန်းခွဲသို့ မြင့်တက်ခဲ့သည်။ စက်တင်ဘာ ၉ ရက်အဖွင့်စျေးတွင်မူ ကျပ် ၃၁၈၀၀၀၀ ခန့်မြင့်တက်လာခဲ့သည်။
”ရွှေဒင်္ဂါးပြားတွေသာ ရောင်းပေးနေတာ ပြည်သူ့လက်ထဲမရောက်ဘူး။ ရန်ကုန်၊ မန္တလေးမှာပါ ရောင်းပေးနိုင်မှ ရွှေစျေးက ကျမှာ” ဟု လက်ရှိရွှေစျေးကွက်အတွင်း ကျပ် ၃၁ သိန်းနှင့် ကျပ် ၃၂ သိန်းအကြား စျေးကစားနေမှုအပေါ် ရွှေလုပ်ငန်းရှင်တစ်ဦးက သုံးသပ်သည်။
နစက၏ ရွှေဒင်္ဂါးပြားများ ရောင်းချမှုကို နေပြည်တော်အပြင် ရန်ကုန်၊ မန္တလေးတွင်ပါ ရောင်းချပေးမည်ဟု သတ္ထုတွင်းဝန်ကြီးဌာနက မီဒီယာများသို့ ဖြေဆိုမှုရှိသော်လည်း တိကျသော ဖြေဆိုမှုမရှိသေးချေ။ လက်ရှိတွင် ပြည်တွင်းဒေါ်လာစျေးမှာလည်း တစ်ဒေါ်လာ ကျပ် ၃၆၀၀ ဝန်းကျင်တွင် တည်ငြိမ်နေပြီး ကမ္ဘာ့ရွှေစျေးမှာမူ ၁ အောင်စလျှင် ၁၇၁၉ ဒေါ်လာဖြစ်သည်။ ထိုသို့ ပြည်တွင်းရွှေစျေး ကျပ် ၃၁ သိန်းဝန်းကျင်၊ တစ်ဒေါ်လာ ကျပ် ၃၆၀၀ ဝန်းကျင် ဖြစ်ပေါ်နေသော်လည်း ရန်ကုန်တိုင်းဒေသကြီးရွှေလုပ်ငန်းရှင်အသင်းကမူ စက်တင်ဘာ ၉ ရက် ရည်ညွှန်းရွှေစျေးနှုန်းကို ရွှေတစ်ကျပ်သား ၂၀၁၂၀၀၀ နှင့် တစ်ဒေါ်လာ ကျပ် ၂၁၀၀ နှုန်းဖြင့်သာ စဥ်ဆက်မပြတ်ဖော်ပြနေသည်။
