MT News
Written by Hey Mar
ရှမ်းပြည်နယ်မြောက်ပိုင်း၊ လားရှိုးမြို့ရှိ ရေကန်တောင်၊ရေကန်အမှတ်(၄/၅)ကြားမှာ ဇူလိုင်လ ၁၄ ရက် မနက် ၁၀ နာရီလောက်က အမျိုးသားတစ်ဦး သေဆုံးနေတာကို တွေ့ရတာကြောင့် လားရှိုးလူငယ် ပရဟိတအဖွဲ့ က ရုပ်အလောင်း သွားရောက်သယ်ဆောင်ပေးခဲ့တယ်လို့ သိရပါတယ်။
အဆိုပါအမျိုးသား သေဆုံးရတဲ့အကြောင်းအရင်းကို သေချာမသိရှိရသေးဘဲ လားရှိုးမြို့မရဲစခန်းက ရဲတပ်ဖွဲ့ဝင်တွေက ဓမ္မတာအတိုင်း သေဆုံးခြင်း ဟုတ်မဟုတ်ကို စုံစမ်းစစ်ဆေးနေတယ်လို့ သိရပါတယ်။ သေဆုံးသူနဲ့ အတူပါလာတဲ့ နိုင်ငံသားစိစစ်ရေးကတ်ပြားအရ သေဆုံးသူရဲ့ အမည်က ဦးလရှီးဘောက်နော်၊အသက်(၃၈)နှစ်၊ (ဘ)ဦးလရှီးနော်ဘုန်လို့ သိရှိရပြီး လားရှိုးမြို့နယ်၊ ပန်ရှော်အုပ်စု၊ ပန်ရှော်ရွာနေထိုင်သူလို့ သိရှိရကြောင်း လားရှိုးလူငယ်ပရဟိတ အဖွဲ့ကနေ သိရပါတယ်။
သေဆုံးသူအမျိုးသား အလောင်းကို အဆိုပါ ပရဟိတ အသင်းရဲ့နိဗ္ဗာန်ယာဥ်နဲ့ သယ်ဆောင်ပြီး လားရှိုးပြည်သူ့ဆေးရုံကြီး-အရေးပေါ်ဌာနကနေတစ်ဆင့် ရင်ခွဲရုံကိုပို့ဆောင်ပေးခဲ့ပြီး ဆေးရုံက (PR-010)နဲ့ လက်ခံထားရှိတယ်လို့ သိရပါတယ်။
