၁၄. ၇. ၂၀၂၃
Written by Pan Ei
K-pop အဆိုတော် အိုင်ဒေါတွေကို မွေးထုတ်ပေးလေ့ရှိတဲ့ Survival Show တွေဟာ တောင်ကိုရီးယားမှာတင်မကဘဲ နိုင်ငံတကာမှာပါ နာမည်ကြီးလူကြိုက်များပါတယ်။ အခုအခါမှာလည်း SBS ရုပ်သံလိုင်းက မကြာမီမှာ တင်ဆက်ပြသတော့မယ့် Universe Ticket ဆိုတဲ့ Survival Show မှာ Riel က ပါဝင်ယှဉ်ပြိုင်သွားမှာဖြစ်ပြီး မြန်မာနိုင်ငံက ပထမဆုံး ပါဝင်သူ ဖြစ်လာခဲ့တာပါ။
Universe Ticket မှာ ပါဝင်သွားမယ့် ပထမ ၄၁ ယောက်ကို မနေ့က စတင်မိတ်ဆက်ခဲ့တာဖြစ်ပြီး မြန်မာနိုင်ငံက ပါဝင်သူ Riel ရဲ့ နာမည်အရင်းက နန်းဧကရီရွှေ ဖြစ်ပါတယ်။ Riel ဟာ ၂၀၀၀ ပြည့်နှစ်ဖွားတစ်ဦးဖြစ်ပြီး မွေးဖွားရာဇာတိကတော့ ရန်ကုန်မြို့ဖြစ်တယ်လို့ သိရပါတယ်။
Riel က အခုလက်ရှိ တောင်ကိုရီးယားမှာ နေထိုင်နေတာဖြစ်ပြီး ရန်ကုန်စီးပွားရေးတက္ကသိုလ်က ကျောင်းသူဟောင်းတစ်ဦး ဖြစ်တယ်လို့လည်း မြန်မာနိုင်ငံက Fan Page တွေရဲ့ ဖော်ပြချက်အရ သိရပါတယ်။
၂၀၂၁ ခုနှစ်က ထွက်ရှိခဲ့တဲ့ နာမည်ကြီး ဒရမ်မာ My Roommate Is a Gumiho မှာလည်း ပါဝင်သရုပ်ဆောင်ခဲ့ဖူးတဲ့ Riel ဟာ Universe Ticket မတိုင်ခင်က i-land 2 Survival Show အတွက်လည်း Audition ဝင်ဖြေခဲ့ဖူးပါတယ်။
အခုလက်ရှိမှာတော့ ပရိုဂရမ် မစခင်ကတည်းက Riel ရဲ့ Fan Page တွေ ရှိနေပြီဖြစ်ပြီး ပရိသတ်တွေကလည်း အားပေးဖို့ အသင့်ဖြစ်နေကြပြီဖြစ်ပါတယ်။
Universe Ticket ဟာ F&F အင်တာတိန်းမန့်လက်အောက်မှာ နှစ်နှစ်နဲ့ ခြောက်လကြာ ဖွဲ့စည်းမယ့် မိန်းကလေးအဖွဲ့အသစ်အတွက် အဖွဲ့ဝင်ရှစ်ဦးကို ရွေးချယ်သွားမှာဖြစ်ပါတယ်။
Ref; Allkpop
