၁၀. ၇. ၂၀၂၃
Written by Peya
ထိုင်းလိဂ် (၁) ကလပ်အသင်းဖြစ်သည့် Uthai Thani FC သို့ ယခုရက်ပိုင်းအတွင်း ရောက်ရှိသွားသည့် မြန်မာ့လက်ရွေးစင်တိုက်စစ်မှူး အောင်သူက အသင်းသစ်အတွက် နှစ်ဂိုးကို ပွဲဦးထွက် သွင်းယူနိုင်ခဲ့ကြောင်း သတင်းရရှိသည်။
Uthai Thani FC အသင်းသို့ အောင်သူ ရောက်ရှိလာပြီ ဖြစ်ကြောင်းကို ဇူလိုင်လ ၈ ရက်တွင် အဆိုပါ အသင်းက တရားဝင် အသိပေး ထုတ်ပြန်ခဲ့ခြင်းဖြစ်ပြီး အဆိုပါ အသင်းသို့ မရောက်မီ အောင်သူသည် Lamphun Warriors အသင်းတွင် ကစားနေခဲ့ခြင်း ဖြစ်သည်။
ဇူလိုင်လ ၉ ရက်က ကမ္ဘောဒီးယားကလပ် Tiffy Army FC နှင့် အဆိုပါ အသင်းတို့ ခြေစမ်းကစားပွဲတွင် အောင်သူ က လူစားဝင်ကစားကာ ပထမဆုံး ပွဲထွက်ရာတွင် ၇၁ မိနစ်နှင့် ၇၉ မိနစ်တို့၌ ဂိုးသွင်းယူနိုင်ခဲ့ခြင်းဖြစ်ကာ Uthai Thani FC အသင်းက ၇ ဂိုး ဂိုး မရှိ ဖြင့် အနိုင်ရရှိခဲ့သည်။
ဩဂုတ်လအတွင်း စတင်တော့မည့် ထိုင်လိဂ် (၁) ပွဲစဉ် ဇယားကိုလည်း အဆိုပါ အသင်းက ထုတ်ပြန်ရာတွင် မြန်မာ့လက်ရွေးစင် တိုက်စစ်မှူး အောင်သူ၏ ပုံကိုလည်း ထည့်သွင်းကာ ဖော်ပြထားသည်ကို တွေ့မြင်ရသည်။
