ဓာတ်ပုံ - ကရုဏာရှင် လူမှုကူညီရေးအသင်း
၁၀. ၇ .၂၀၂၃
Written by Hey Mar
နေပြည်တော်၊ ဇေယျာသီရိမြို့နယ်၊ ရန်ကုန် – မန္တလေးလမ်းဟောင်းမှာ စိတ်ကျန်းမာရေးမကောင်းသူ အိမ်ခြေမဲ့ အမျိုးသားတစ်ဦးကို ယာဥ်တိုက်ပြေးတဲ့အတွက် အဆိုပါအမျိုးသား နေရာတင်သေဆုံးမှု ဇူလိုင် ၉ ရက် ည ၁၀ နာရီဝန်းကျင်က ဖြစ်ပွားခဲ့တယ်လို့ ကရုဏာရှင် လူမှုကူညီရေး ပရဟိတအသင်းကနေ သိရပါတယ်။
ဖြစ်စဥ်ဟာ နေပြည်တော်၊ ဇေယျာသီရိမြို့နယ်၊ ရန်ကုန် -မန္တလေး လမ်းဟောင်း၊ စိမ်းစားပင်ကွေ့၊ သာယာစုကျေးရွာလမ်းထိပ်မှာ စိတ်ကျန်းမာရေးမကောင်းသူ အမျိုးသားတစ်ဦးကို ယာဥ်အမျိုးအစားမသိရတဲ့ မျက်မြင်မရှိလိုက်တဲ့ ယာဥ်တစ်စီးက မတော်တဆ တိုက်ပြီး ထွက်ပြေးတိမ်းရှောင်သွားတယ်လို့ ယူဆရတာပါ။ အဆိုပါဖြစ်စဥ်ကို သက်ဆိုင်ရာတာဝန်ရှိသူတွေ စုံစမ်းစစ်ဆေးမှုတွေ ပြုလုပ်နေပြီး လူမှုကူညီရေးအသင်းတွေဆီ ရုပ်အလောင်း လာရောက်ကူညီ သယ်ဆောင်ပေးဖို့ ဆက်သွယ်တာကြောင့် ကရုဏာရှင်လူမှုကူညီရေးအသင်းက သွားရောက် ကူညီသယ်ဆောင်ပေးခဲ့တယ်လို့ သိရပါတယ်။
ကားတိုက်ခံခဲ့ရတဲ့ အမျိုးသားဟာ ဦးခေါင်းတစ်ခြမ်းပွင့်ထွက်ပြီး ခန္ဓာကိုယ်ပွန်းပဲ့ဒဏ်ရာတွေနဲ့ သေဆုံးခဲ့တာပါ။ ရုပ်အလောင်းကို ပြည်သူ့ဆေးရုံကြီးကုတင်(၁၀၀၀)သို့ ကရုဏာရှင်လူမှုကူညီရေးပရဟိတအသင်းက ပို့ဆောင်ကူညီပေးခဲ့တယ်လို့ သိရပါတယ်။
