၈.၇.၂၀၂၃
Written By Thandar
ပရိသတ်တွေ စိတ်ဝင်တစား စောင့်မျှော်နေတဲ့ အဆိုတော် ရွှေထူး၊ ရွှေမှုံရတီနဲ့ ညီမဖြစ်သူ ငွေမှုံရတီတို့ သုံးဦးရဲ့ အနုပညာပေါင်းစပ်ဖန်တီးမှု လက်ရာတစ်ခုလည်းဖြစ်တဲ့ “Sway” Music Video သီချင်းဟာ ဒီနေ့ ဇူလိုင် ၇ ရက် ညနေပိုင်းမှာ ထွက်ရှိလာမှာဖြစ်ပါတယ်။
“ကျွန်တော်ရယ်၊ ရွှေမှုံရယ်၊ ငွေမှုံတို့ သီဆိုထားတဲ့ ဆွေးဆိုတဲ့ သီချင်းလေးပါ။ ဆွေးဆိုတဲ့ သီချင်းအတိုင်းပဲ အဆွေးခံစားချက်လေး ခံစားရမှာပါ။ သီချင်းပုံစံလေးက အဆွေးပုံစံလေးပေါ့။ အဓိကကတော့ ငွေမှုံရတီကို ကျွန်တော် မွေးနေ့လက်ဆောင်ပေးတဲ့အနေနဲ့ ရေးပေးထားတဲ့သီချင်းလေးပါ။ ကျွန်တော်ကလည်း သီချင်းတစ်ပုဒ်ရေးရင် ၂ နှစ်လောက်စောင့်ရတော့ ဒီသီချင်းထွက်လာတော့ ရွှေမှုံကလည်း ဝင်ဆိုမယ်ဆိုပြီး ပြောတယ်။ အငယ်မကလည်း သဘောတူတာနဲ့ သုံးယောက်တူတူ ဆိုဖြစ်သွားတာပါ”လို့ အဆိုတော် ရွှေထူးက ပြောပါတယ်။
အဆိုတော် ရွှေထူးကတော့ ပရိသတ်တွေကြားမှာ ဂီတပိုင်းနဲ့ ပတ်သက်ရင် အောင်မြင်မှုရရှိထားတဲ့ အဆိုတော်တစ်ဦးလည်း ဖြစ်ပါတယ်။ အဆိုတော်ရွှေထူးနဲ့ သရုပ်ဆောင် ရွှေမှုံရတီတို့ အိမ်ထောင်ကျပြီး နောက်ပိုင်းမှာ သရုပ်ဆောင် ရွှေမှုံရတီနဲ့အတူ ညီမဖြစ်သူ သရုပ်ဆောင် ငွေမှုံရတီတို့ပါ တေးသီချင်းတွေကို သီဆိုလာခဲ့တာလည်း ဖြစ်ပါတယ်။
ယနေ့ ဇူလိုင် ၇ရက်က ညနေပိုင်းမှာ ထွက်လာမယ့် ရွှေထူး၊ ရွှေမှုံရတီနဲ့ငွေမှုံရတီတို့ရဲ့ Sway တေးသီချင်း Teaser ထွက်ရှိချိန်မှာလည်း ပရိသတ်တွေက စိတ်ဝင်တစား စောင့်ကြည့်အားပေးလျှက်ရှိပါတယ်။
ရွှေနှစ်ရွှေတို့ သီဆိုခဲ့တဲ့ “အမှား” တေးသီချင်းကလည်း ပရိသတ်တွေကြားမှာ အောင်မြင်မှု ရရှိခဲ့သလို ညီမဖြစ်သူ ငွေမှုံရတီနဲ့ အဆိုတော် ရွှေထူးတို့ သီဆိုခဲ့တဲ့ “ဖြေ” သီချင်းကလည်း ပရိသတ် ကြိုက်နှစ်သက်မှုများစွာရရှိခဲ့တဲ့ တေးသီချင်းကောင်း တစ်ပုဒ်ဖြစ်လာခဲ့ပါတယ်။
ရွှေနှစ်ရွှေရဲ့ “မိုးရေစက်များက ပြောသော” တေးသီချင်းကလည်း ပရိသတ်အကြိုက်တွေ့ခဲ့သေးတာလည်းဖြစ်ပြီး သူတို့ နှစ်ယောက်ရဲ့ အိမ်ထောင်သက်ဟာ မကြာခင်မှာ ၅ နှစ်ပြည့်တော့မှာဖြစ်ပါတယ်။
