၅.၇.၂၀၂၃
Written By Thandar
တေးရေးပိုင်းရော တေးဆိုပိုင်းမှာပါ ပရိသတ်အားပေးမှုများစွာရရှိထားတဲ့ အဆိုတော်ကောင်းကောင်းက ဆယ်စုတစ်ခုကျော်အောင်မြင်ခဲ့တဲ့ “ရာဇဝင်တွင်မယ့်ချစ်ခြင်း”သီချင်းကို Modify ပြန်လုပ်ထားတာမို့ ဒီလိုဆန်းသစ်ထားကို နားလည်ပေးပါလို့ ဆိုပါတယ်။
“ကျွန်တော်တို့ ရာဇဝင်တွင်မယ့်ချစ်ခြင်း သီချင်းလေးက Version အသစ်နဲ့ ပြန်ထွက်လာမယ်။ ဒီသီချင်းလေးက အရမ်းကို သီဆိုလို့ကောင်းတယ်။ ညီမလေး ထက်အဥ္ဇလီကြိုက်တယ်ဆိုတော့ အမှတ်တရလေးဖြစ်အောင် ပြန်ဆိုထားတာပါ။ အရင်တုန်းကပုံစံ သီဆိုထားပေမယ့် တီးခတ်မှုအပိုင်းမှာ တော်တော်လေးကွဲထွက်သွားတယ်။ ဒီဘက် Hip Hop တီးတဲ့ လူငယ်တွေတီးခတ်တာမို့ ခေတ်အညီလိုက်ဆိုရတာရှိတယ်”လို့ အဆိုတော် ကောင်းကောင်းက ပြောပါတယ်။
အဆိုပါ တေးသီချင်းကို အဆိုတော် ကောင်းကောင်းနဲ့ ထက်အဉ္ဇလီတို့က အတွဲညီညီ Version အသစ်အနေနဲ့ ပြန်လည်တွဲဖက် သီဆိုထားကြတာပဲ ဖြစ်ပါတယ်။
“ရာဇဝင်တွင်မယ့်ချစ်ခြင်း”သီချင်း Music Video လေးကို ကောင်းကောင်းနဲ့ ကေကေမိုးတို့တစ်တွဲ ဗညားဘုန်းပြည့်နဲ့ ထက်အဉ္ဇလီတို့ အတွဲ ၂ တွဲရဲ့ ချစ်စရာကောင်းတဲ့ Moment လေးတွေကိုလည်း လာမယ့် ဇူလိုင် ၉ ရက်နေ့ ညမှာ Love TV Online ကနေ ထုတ်လွှင့်ပေးမှာဖြစ်ပါတယ်။
“ဒီသီချင်းက ဆယ်စုနှစ်တစ်ခုကျော်လာတဲ့ သီချင်းလေးကို ပြန်ပြီး အသစ်ပြန်လုပ်တဲ့အပေါ်မှာ တချို့က အဟောင်းကို နားယဥ်နေတဲ့သူတွေ ရှိတယ်။ ဒီသီချင်းကို ကျွန်တော်တို့ ကြိုက်လို့ တစ်ခေါက် ပြန်ဆိုတာပါ။ လွန်ခဲ့တဲ့ ၁၀ နှစ်က သီချင်းနဲ့ မတူတဲ့အပေါ်မှာ ပရိသတ်တွေ နားလည်ပေးပါလို့ ပြောချင်တယ်။ Modify ပြန်လုပ်ထားတာမို့ ဒီဆန်းသစ်ထားကို နားလည်ပေးပါ။ ကျွန်တော်နဲ့ သူငယ်ချင်းကေကေမိုးနဲ့ တစ်တွဲအနေနဲ့ သရုပ်ဆောင်ထားတယ်။ အပျော်လေး သရုပ်ဆောင်ထားကြပါတယ်” လို့ သူကဆက်ပြောပါတယ်။
