၅. ၇. ၂၀၂၃
Written By Thandar
နှင်းဆီ ဇာတ်လမ်းတွဲနဲ့ ပရိသတ်အားပေးမှု ပိုမိုရရှိခဲ့တဲ့ သရုပ်ဆောင် ဝေလာရီက မကြာမီအချိန်မှာ ရေနံ့သာခင်ခင်ကြီး ဇာတ်ရုပ်နဲ့ ပရိသတ်တွေမြင်တွေ့ရမှာလို့ ပြောလာပါတယ်။
“အဲဒီကားလေးကို ရိုက်နေတဲ့အတွက်ကြောင့်လည်း အခုလတ်တလောမှာ အနုပညာလှုပ်ရှားမှုတွေ မတက်သေးတာပါ။ ဇာတ်လမ်းတွဲနာမည်လေးက ရေနံ့သာခင်ခင်ကြီးဆိုတဲ့ ဇာတ်လမ်းတွဲပါ။ အဲဒီဇာတ်လမ်းတွဲမှာ ဝေလာက ရေနံ့သာခင်ခင်ကြီးနေရာကနေ ပါဝင်ထားတာပါ။ အဲဒီမှာလည်း ဝေလာကို မြင်ရမှာပါ၊ တစ်ချိန်လုံး ဆံထုံးတွေနဲ့ ရှေးခေတ်ပုံစံမျိုးတွေ မြင်တွေ့ရပါမယ်”လို့ သရုပ်ဆောင် ဝေလာရီကပြောပါတယ်။
ရေနံ့သာခင်ခင်ကြီး ဝတ္ထုက အောင်မြင်ပြီးသားဖြစ်တဲ့အတွက် ဇာတ်လမ်းတွဲအဖြစ် ပြန်လည် ရိုက်ကူးပုံဖော်ချိန်မှာလည်း အခက်အခဲများစွာရှိခဲ့ပြီး သုံးနှစ်ခန့် အချိန်ယူကာ ရိုက်ကူးခဲ့ရတဲ့ ဇာတ်လမ်းတွဲ ဖြစ်တယ်လို့လည်း ဆိုပါတယ်။
“ဝေလာက ရေနံ့သာခင်ခင်ကြီးနေရာကနေ သရုပ်ဆောင်ထားတာပါ။ ဝေလာ့အတွက် တာဝန်လည်း ကြီးတော့ အကောင်းဆုံး ကြိုးစားထားပါတယ်။ နှင်းဆီလိုမျိုး တကယ့်ကို ပရိသတ်တွေကြိုက်မယ့် ဇာတ်လမ်းတွဲလေးပါ ထွက်ရှိလာရင်လည်း အားပေးကြပါဦး”လို့ သူမက ဆက်ပြောပါတယ်။
ဝေလာရီဟာ မကြာခင် ရက်ပိုင်းကလည်း တေးရေး တာရာလင်းလက် ရေးဖွဲ့သီကုံးထားတဲ့ “မေမေ့ကို ပြောပါ” Music Video ကိုလည်း W Entertainment မှ ဖြန့်ချိခဲ့တာလည်း ဖြစ်ပါတယ်။
